8-17 март кунлари Сербиянинг Ниш шаҳрида бокс бўйича аёллар ўртасида жаҳон чемпионати бўлиб ўтади. Ушбу нуфузли мусобақада Ўзбекистон терма жамоаси ҳам иштирок этади. Жамоамиз аъзолари жаҳон биринчилиги учун курашиш мақсадида Сербияга жўнаб кетишди.

Қайд этилишича, терма жамоамизнинг мураббийлар штаби жаҳон чемпионатида иштирок этадиган спортчилар таркибини аниқлади. Тажрибали мураббий Элшод Расулов бошчилигидаги жамоа таркибидан 12 нафар боксчи жой олди. Улар турли вазн тоифаларида Ўзбекистон шарафини ҳимоя қилади ва юқори натижаларга эришиш учун рингга чиқишади.

Жамоа таркибидан -48 кг вазн тоифасида Фарзона Фозилова, -50 кгда Сабина Бобоқулова, -52 кгда Феруза Казакова ва -54 кгда Азиза Ёқубова жой олган. -57 кгда Нигина Ўктамова, -60 кгда Ситора Турдибекова, -63 кгда Одинахон Исмоилова, -66 кгда эса Навбаҳор Ҳамидова иштирок этади.

Шунингдек, -70 кг вазн тоифасида Ойша Тоирова, -75 кгда Азиза Зокирова, -81 кгда Соҳиба Рўзметова ҳамда +81 кг вазн тоифасида Олтиной Сотимбоева жаҳон чемпионатида иштирок этишади. Ушбу спортчилар ўз кучларини синаб кўриш ва халқаро майдонда юқори натижаларга эришиш учун тайёргарлик кўриб келишган.

Ўзбекистон боксчи қизлари олдинги йилларда халқаро майдонларда ўзларини кўрсатиб келишган. Ушбу жаҳон чемпионатида ҳам улар ўз маҳоратларини намойиш этиб, юртимиз байроғини баланд кўтаришга ҳаракат қилишади. Чемпионатда иштирок этаётган боксчиларимизга омад тилаймиз!