Архив фото

Шу йилнинг 24 сентябрь куни кечқурун Россиянинг Шереметьево аэропортида иккита йўловчи самолёт тўқнашиб кетди.

Бу ерда Пекиндан келган «Hainan Airlines» авиакомпаниясининг «Airbus A330» лайнери Санкт-Петербургга жўнаб кетишга тайёрланаётган «Россия ҳаво йўллари»га тегишли «Sukhoi Superjet 100» самолётининг дум қисмига келиб урилган. Федерал ҳаво транспорти агентлиги маълумотларига кўра, ҳодиса оқибатида ҳеч ким жабрланмаган.

Зарбдан сўнг ҳар икки самолётга зиён етган. Хусусан «Sukhoi Superjet 100»нинг рули, «Airbus 330» эса қанот қисми зарар кўрган. Воқеа ҳаёт учун хавфли оқибатларга олиб келмайдиган авиация ҳодисаси сифатида таснифланган. Ёнғин ёки ёқилғининг сизиб чиқиши ҳақида хабар берилмаган. Воқеа юз берган вақтда рус самолёти бортида 84 йўловчи ва беш экипаж аъзоси бўлган. Тўқнашувдан сўнг улар эвакуация қилинган ва кейинчалик захира самолёти орқали Санкт-Петербургга учиб кетган.

Пекиндан келган ҳаво кемаси бортида 264 нафар йўловчи ва экипаж аъзолари бўлган. Ҳодисадан сўнг самолёт техник кўрикдан ўтказиш учун юборилган. Парвоз захира самолётда амалга оширилиши керак. ОАВ маълумотларига кўра, Хитой авиакомпаниясининг айрим йўловчилари рейс кечиктирилгани ва Москвада тунаш зарурати ҳақида хабар берган. «Hainan Airlines» авиакомпанияси ҳозирча воқеа юзасидан расмий изоҳ бермаган.

Шереметьево аэропортининг хабар беришича, унинг хизматлари зудлик билан ва қоидаларга тўлиқ мос равишда жавоб берган. Воқеа жойига фавқулодда қутқарув бўлинмалари етиб келган, бироқ уларнинг ёрдами талаб қилинмаган. Аэропорт матбуот хизмати «вазият парвозлар хавфсизлигига таъсир қилмагани ва фавқулодда хизматлар томонидан ушлаб турилганини» таъкидлади.

Россия Федерал ҳаво транспорти агентлиги тўқнашув сабабларини ўрганиш учун комиссия тузди. Уни агентлик раҳбари ўринбосари Андрей Потемкин бошқаради. Комиссия таркибига ердан хизмат кўрсатиш бўйича мутахассислар, парвозлар хавфсизлиги бўйича муҳандислар, ҳаво ҳаракатини бошқариш хизматлари вакиллари киради. Комиссия экипажларнинг ҳаво ҳаракатини бошқариш билан алоқаларини таҳлил қилади, парвоз маълумотларини қайд қилувчи қурилмаларни ўрганади, ҳаво кемасининг техник ҳолатини баҳолайди.

Бундан ташқари, Шимоли-ғарбий транспорт прокуратураси ўз терговини бошлади. «Парвоз хавфсизлиги қоидалари ва йўловчилар ҳуқуқларига риоя этилиши баҳоланади», — дейилади идора хабарида. Текширув натижаларига кўра, қўшимча хавфсизлик чоралари ва хизматлар ёки экипажлар учун мумкин бўлган жавобгарлик тўғрисида қарор қабул қилиниши мумкин.