Россияда етакчи таҳлилчилар АҚШ президенти Дональд Трампнинг Венесуэлага доир режалари Россия иқтисодиёти учун кенг кўламли оқибатларга олиб келиши мумкинлигидан хавотир билдирмоқда.

Таъкидланишича, Венесуэла дунёдаги энг йирик нефть захираларига эга бўлсада, араб давлатлари ва Россияга нисбатан жуда кам ҳажмда нефть экспорт қилади. Мамлакатдаги «PDVSA» нефть компанияси самарасиз ва иш қобилияти паст деб баҳоланади. Шунингдек, АҚШ санкциялари эса мамлакатнинг нефть экспортини янада чеклаб қўйган.

Бугунга келиб, Венесуэланинг улкан нефть захиралари Америка корпорациялари учун катта салоҳият сифатида кўрилмоқда. Дональд Трамп бу борада ўз ниятларини яширмаган ва аввалроқ биз жуда йирик нефть компанияларимизни мамлакатга юборамиз, деган эди.

Мазкур вазият Россия учун стратегик аҳамиятга эга ҳисобланиб, мамлакатдаги нефть нархи давлат бюджети учун ҳал қилувчи омилдир. Россия молия вазирлиги 2026 йил бюджети режасида «Urals» нефтининг бир баррели учун 59 долларлик нархни назарда тутган, бироқ ҳозирда унинг қиймати 50–52 доллар атрофида сақланмоқда. Таҳлилчиларга кўра, нарх яна бироз пасайса, бюджетда жиддий тақчиллик кузатилиши мумкин.

АҚШнинг Венесуэладаги операциясидан бироз аввал миллий энергетика хавфсизлиги жамғармаси таҳлилчиси Игор Юшков «finance.mail.ru» порталига берган интервьюсида Мадуронинг омон қолиши Россия учун ҳам иқтисодий ҳам сиёсий жиҳатдан муҳим эканини таъкидлаган. Таҳлилчининг фикрича, Мадуронинг ҳокимиятдан ағдарилиши Россияга қарши кейинги ҳаракатлар учун намуна бўлиши мумкин.

Россиялик иқтисодчи Сергей Суверов «Аргументы и факты» газетасига берган интервьюсида АҚШнинг муваффақиятли операциясидан сўнг нефть нархлари пасайиши кутилаётганини яшириб ўтирмаган. Унинг айтишича, кейинги икки–уч йил ичида америкаликлар глобал бозорга нефть етказиб бериш ҳажмини сезиларли даражада ошириш имконига эга бўлади.

Бундан ташқари, россиялик олигарх Олег Дерипасканинг Telegram каналида қолдирган хабари ҳам турли муҳокамаларга сабаб бўлди.

«Кўринишидан уларнинг режаси нефть нархини баррели учун 50 доллардан ошмаслигини таъминлаш», — деб ёзган Дерипаска.

Унинг фикрича, бу ҳолат Кремлни харажатларни қисқартириш, давлат мулкини сотиш ёки хусусий секторга қўшимча солиқлар жорий этишга мажбур қилиши мумкин. Дерипаска бу жараённи америкаликлар дунё нефть захираларининг ярмидан ортиғини назорат қилаётгани билан изоҳлаган.