Россия Украинанинг ўз ҳудудига қарши узоқ масофага учувчи ATACMS ракеталарини қўллаши Москвага қарши “Ғарб урушининг янги босқичи” эканлигини айтиб, шунга монанд жавоб бериш билан огоҳлантирди. Украинанинг ATACMS дан фойдаланиш тўғрисидаги имконияти Жо Байден Оқ уйдан кетиш арафасида ва Шимолий Корея аскарларининг Курск майдонида пайдо бўлганидан сўнг яратилди.

Вашингтон Киевга Россия нишонларига қарши узоқ масофали қуроллардан фойдаланиш учун “яшил чироқ ёққанидан” бир неча кун ўтиб, Москва сешанба куни Украина АҚШда ишлаб чиқарилган ракеталарни Россиянинг Брянск чегарасидаги ҳарбий объектни нишонга олиш учун ишлатганини айтди.

Россия Мудофаа вазирлиги Украина Россиянинг Брянск вилоятига олтита ракета билан зарба берганини, ҳаво ҳужумидан мудофаа тизимларининг бештасини тутиб олиб, улардан бирига зарар етказганини маълум қилган.

Россия ташқи ишлар вазири Сергей Лавров Бразилияда бўлиб ўтган G20 матбуот анжуманида сўзга чиқиб, ҳужум ҳақида фикр билдирган ҳолда иттифоқчилари Украинани кучайтиришни мақсад қилганини таъкидлади.

“Биз буни Ғарбнинг Россияга қарши урушининг сифат жиҳатидан янги босқичи сифатида қабул қиламиз. Шунга яраша муносабат билдирамиз”, — дея қўшимча қилди у Вашингтонни Киевга ракеталарни бошқаришда ёрдам беришда айблаб.

Шунингдек, сешанба куни Владимир Зеленский Украина узоқ масофали қуролларга эга бўлиш учун иттифоқчилари билан муваффақиятли ишлаётганини таъкидлади. Россиянинг Брянск вилоятидаги ҳужум ҳақида сўралганда, Украина армияси қандай қурол ишлатганини ошкор қилмади, бироқ украиналик расмий манба ва аноним тарзда маълумот берган АҚШ расмийси “Reuters” ахборот агентлигига ATACMSдан фойдаланганини билдирган.

Россия Ташқи ишлар вазири Сергей Лавров Ғарбни Путин имзолаган ядро қуролидан фойдаланиш бўйича янгиланган фармонни ўқиб чиқишга чақирди. Россия бир неча ойдан бери Украина АҚШ, Буюк Британия ва Франция ракеталарини отишга рухсат олса, Москва НАТО аъзоларини Украинадаги урушда бевосита иштирок этган, деб ҳисоблашини эслатиб келади.

Сешанба куни АҚШ Давлат департаменти матбуот котиби Мэтью Миллернинг айтишича, АҚШ Россиянинг янгиланган ядро дастуридан ҳайратга тушмаганини ва бу орқали Москва Украина ҳамда унинг атрофидаги давлатларни қўрқитмоқчи эканлигини айтган. Британия Бош вазири Кир Стармер қайта кўриб чиқилган ядровий доктринани вайрон бўлган Россия маъсулиятсизлигининг сўнгги намунаси эканлигини билдирди.