Фото: dzen.ru

Россия Украинанинг чегара минтақасига бостириб кириши давом этаётгани сабабли Курск атом электр станциясини ёпиш масаласини кўриб чиқмоқда. Россия атом энергетикаси агентлиги раҳбари Алексей Лихачёв бу вариант Украина кучлари олдинга силжиши билан муҳокама қилинаётганини тасдиқлаган. Бу ҳақда «Newsweek» хабар берди.

Маълум қилинишича, бу борада якуний қарор қабул қилингани йўқ, ҳозирда заводнинг тўртта агрегатидан фақат биттаси ишлаб турибди. Курск атом электр станцияси ушбу шаҳардан 40 километр ғарбда ва Украина чегарасидан тахминан 110 километр узоқликда жойлашган.

Россия матбуоти эҳтиёт чораси сифатида завод атрофида қўшимча ҳимоя воситалари қурилаётганини хабар қилди. Курск вилоятида тўқнашувлар Украина кучлари август ойи бошида ҳудудга кирганидан кейин кучайганди. Александр Сладков каби баъзи россиялик блогерлар Украина атом станциясини ўз назоратига олишга ҳаракат қилиши мумкин, деб тахмин қилишди.

Шунга қарамасдан, Украинанинг бундай ниятлари борлигини тасдиқловчи далиллар йўқ. БМТнинг Атом энергияси бўйича халқаро агентлиги раҳбари Рафаэль Гросси август ойи охирида заводга ташриф буюрган ва вазият ядровий хавф туғдираётганини тан олган эди.

Россия президенти Владимир Путин Украина кучлари Курск атом электр станциясини нишонга олишга ҳаракат қилгани ҳақида ўз фикрини билдирганди. У бу тахмин қилинган зарбаларни «жуда хавфли терактлар» деб таърифлаб, Россия жавоб қайтарса, Европа учун эҳтимолий оқибатларга ишора қилган.

Лихачёв Курск АЭСнинг минтақани энергия билан таъминлашдаги аҳамиятини таъкидлаб, иложи бўлса, унинг ишлашини сақлаб қолиш муҳимлигини айтди. Унинг қайд этишича, ҳозирда завод атрофидаги хавфсизлик чоралари етарли даражада деб ҳисобланмоқда. Шунга қарамай, давом этаётган можаро туфайли заводнинг фаолияти тўхтатиб қўйилиши ҳам мумкин.

Қироллик Бирлашган Хизматлар Институти (Буюк Британия) экспертларининг таъкидлашича, Россия заводга таҳдидни сиёсий сабабларга кўра бўрттириб кўрсатаётган бўлиши мумкин. Уларнинг фикрича, Москва Украинага қарши урушда ядровий авария қўрқувидан ўз манфаати учун фойдаланмоқда.

Аввалроқ, XVII ёзги Паралимпия ўйинлари якунланиб, унда Ўзбекистон делегациясининг натижаси қандай бўлгани ҳақида хабар берилганди.