Неча асрларки, чўлу биёбонга айланиб ётган «Қумсултон»да яқин истиқболда қум кўчкилари ўрнини ям-яшил далалар эгаллайди. Бухоро туманидаги мазкур ҳудудда ҳозир қудратли техника воситалари воситасида мелиоратив юмушлар бажариляпти. Икки минг гектар майдон босқичма-босқич ўзлаштирилмоқда.

Мазкур лойиҳа «Уч Қарағай» масъулияти чекланган жамияти пахтачилик кластери ҳамда хитойлик инвесторлар билан ҳамкорликда амалга ошириляпти. Режага мувофиқ, ўзлаштирилган ерларда замонавий агротехнологияларга асосланган ҳолда пахта етиштирилади. Томчилатиб суғориш тизимлари тортилади, ернинг мелиоратив ҳолатини яхшилаш тадбирлари кўрилади, албатта. Ҳосилдорлик эса юқори бўлиши кутиляпти. Лойиҳанинг яна бир муҳим жиҳати шундаки, маҳаллий аҳолининг бандлигини таъминлаш учун янги иш ўринлари юзага келади. Ҳудуднинг экспорт салоҳияти ошади. Саҳро қиёфаси ҳам ўзгаради.

Бу юмушга пухта ҳозирлик билан киришилганини қайд этиш жоиз. Гап шундаки, ўтган йилда синов тариқасида чўлдан 350 гектар ер ўзлаштирилган ва бу майдондан юқори ҳосил олинган эди. Шу тажриба ушбу лойиҳани амалга оширишда қўл келиши, шубҳасиз.

Истам ИБРОҲИМОВ, «Халқ сўзи».