Қудратилла НАЖМИДДИНОВ/«Халқ сўзи». Наманган вилояти Чуст туманининг қўшни Қирғиз Республикаси билан чегарадош Қорақўрғон маҳалласида 4,5 мингга яқин аҳоли истиқомат қилади. Ҳудуддан ўтган Кўксераксой устига ҳашар йўли билан қурилган кўприкни тез-тез сел олиб кетиши жиддий муаммога айланган эди. Аҳолининг тегишли идораларга мурожаати билан масала яқинда ечимини топди — кўприк янгиланди. Янгиланибгина қолмай, ҳар қандай селга бардош бера оладиган қилиб бутунлай қайта қурилди.

Замонавий кўприкнинг узунлиги 42, эни 7 метрга тенг, икки ёнида пиёдалар йўлакчаси ҳам бор. Пудратчи ташкилот – «Cone stru projek invest» масъулияти чекланган жамияти қурувчилари объектни роппа-роса 70 кунда битказиб берди. Уни барпо этиш учун давлат бюджетидан 1 миллиард 900 миллион сўм маблағ йўналтирилди.

— Йўл, кўприк қуриш халқимизда энг савоб ва эзгу ишлардан ҳисобланади, — дейди “Қорақўрғон” маҳалла фуқаролар йиғини раиси Мелиқўзи Тўхтаев. — Мустаҳкам кўприк нафақат бизнинг маҳалламиз, балки ён-атрофдаги Қальа, Беруний, Ватанпарвар аҳоли пунктлари аҳлининг мушкулини ҳам осон қилди.

Маҳалла раисининг айтганича бор. Кенг ва равон кўприкдан қатнаётганлар борки, уни бунёд этганларга миннатдорлик билдирмоқда.