Ўзбекистонда иқтисодий жиноятларга қарши курашиш тизимини такомиллаштириш мақсадида янги қонун қабул қилинди. «Иқтисодий жиноятларга қарши курашиш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонун расман тасдиқланди.

Ушбу қонун билан Жиноят-процессуал кодекси ва «Коррупцияга қарши курашиш тўғрисида»ги қонунга муҳим ўзгартиришлар киритилди. Унга кўра, Иқтисодий жиноятларга қарши курашиш департаменти жиноят ишлари бўйича тергов юритиш ваколатларига аниқлик киритилади. Бу эса иқтисодий ҳуқуқбузарликларни аниқлаш ва уларга қарши курашиш механизмларини кучайтиришга хизмат қилади.

Бундан ташқари, Маъмурий жавобгарлик тўғрисидаги кодекс ва Бюджет кодексига ҳам қатор ўзгартиришлар киритилди. Унга кўра, Иқтисодиёт ва молия вазирлиги ҳузуридаги Давлат молиявий назорати органлари ваколатлари Иқтисодий жиноятларга қарши курашиш департаменти ҳузуридаги Давлат молиявий назорати инспекцияси зиммасига юклатилди. Бу чора-тадбирлар молиявий назоратни кучайтириш ва давлат маблағларидан мақсадли фойдаланишни таъминлашга қаратилган.

Янги қабул қилинган қонун расмий эълон қилинган кундан бошлаб кучга киради. Ушбу қонун ислоҳотлари иқтисодий жиноятларга қарши курашиш тизимини такомиллаштириш ва қонун нормаларининг аниқ ва бир хил қўлланилишини таъминлашга хизмат қилиши кутилмоқда.