Қибрай туманида кучли таъсир қилувчи дори воситалари савдоси билан шуғулланиб келган шахслар ушланди. Бу ҳақида Иқтисодий жиноятларга қарши курашиш департаменти хабар берди.

Унда айтилишича, Бош прокуратура ҳузуридаги Департаментнинг Қибрай тумани бўлими ва бошқа ҳуқуқни муҳофаза қилувчи орган ходимлари ҳамкорлигида тезкор тадбир ўтказилган.

Тезкор тадбир давомида фуқаро Д.А. 1 860 дона «ПРО ЛИПОЛЙТИC» номли кучли таъсир қилувчи дори воситасини фуқарога 1 000 АҚШ долларига сотган вақтида ашёвий далиллар билан қўлга олинган.

Ҳамкорликда ўтказилган яна бир тезкор тадбирда, муқаддам ЖКнинг 246-моддаси билан судланган фуқаро А.А.нинг «Маърифат» МФЙ ҳудудидаги хонадони кўздан кечирилганда, 540 дона кучли таъсир қилувчи дори воситасини сотиш мақсадида сақлаб келаётганлиги аниқланиб, ушбу дори воситаси ашёвий далил сифатида расмийлаштириб олинган.

Ҳозирда мазкур ҳолатлар юзасидан Жиноят кодексининг 251-1-моддаси (гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи моддаларни тарғиб қилувчи маҳсулотни тайёрлаш, тарқатиш, реклама қилиш, намойиш этиш ёки бундай моддаларни ёхуд заҳарли моддаларни қонунга хилоф равишда муомалага киритиш) билан жиноят иши қўзғатилиб, тергов ҳаракатлари ўтказилмоқда.