Қашқадарёда «Жиҳодчилар» экстремистик оқимининг 8 нафар аъзоси 6 йилдан 10 йил 6 ойгача озодликдан маҳрум этилди. Бу ҳақда Давлат хавфсизлик хизмати Қашқадарё вилояти бошқармаси ва Ички ишлар органлари ҳамкорлигида ўтказилган тезкор-қидирув тадбирлари натижаларида маълум қилинди.

Маълумотларга кўра, жиноий гуруҳ Қарши туманида яшовчи, 1977 йилда туғилган, аввал ҳам бир неча бор Жиноят кодексининг турли моддалари бўйича судланган ва ўта хавфли рецидивист ҳисобланган фуқаро томонидан ташкил этилган. У Қарши шаҳри ҳамда Қарши туманида яшовчи, 1964–1986 йиллар оралиғида туғилган яна 7 нафар фуқарони ўз сафига жалб қилган ва улар билан биргаликда яширин диний жамоат тузган.

Тергов жараёнида маълум бўлишича, гуруҳ аъзолари ўз хонадонларида йиғилишлар ўтказиб, «ҳалифалик давлати»ни барпо этиш ғояларини муҳокама қилишган. Шунингдек, ижтимоий тармоқлар орқали халқаро террористик ташкилотларнинг ғоявий материалларини – жиҳод, ҳижрат ва ҳалифалик мавзуларидаги аудио ва видеоларни бир-бирларига тарқатган.

Таъкидлаш жоизки, ушбу гуруҳ аъзоларидан 4 нафари илгари ҳам жиноят содир этиб, жазо муддатини ўтаб чиққан бўлса-да, ўз қилмишларидан хулоса чиқармаган. Улар экстремистик фаолиятни қайтадан давом эттирганлар.

Жиноят ишлари бўйича Қарши туман суди томонидан мазкур шахслар Ўзбекистон Республикаси Жиноят кодексининг 159-моддаси (Конституцион тузумга тажовуз), 244¹-моддаси (Экстремистик материаллар тайёрлаш ва тарқатиш), 244²-моддаси (Ноқонуний диний ташкилотларда иштирок этиш) бўйича айбли деб топилди. Суд ҳукмига кўра, уларга 6 йилдан 10 йил 6 ойгача озодликдан маҳрум қилиш жазоси тайинланди.