Фото: KCNA via KNS/AFP

Россия президенти Владимир Путин Шимолий Корея етакчиси Ким Чен Ин билан суҳбат чоғида КХДР аскарларининг Россиянинг Курск вилоятини Украина қўшинларидан қайтариб олишдаги жасоратини юқори баҳолади. Бу ҳақда Шимолий Корея давлат матбуоти хабар берди.

Корея марказий ахборот агентлигига кўра, Путин шимолий кореялик ҳарбийлар кўрсатган қўллаб-қувватлов учун миннатдорлик билдирган. Ким Чен Ин эса Пхеньян ўтган йили имзоланган ўзаро мудофаа шартномасига содиқ қолишини ва Россия раҳбариятининг барча келгуси ҳаракатларини тўлиқ қўллаб-қувватлашини айтган.

Хабарда қайд этилишича, икки давлат раҳбарлари ўзаро манфаатли масалалар юзасидан фикр алмашиб, келгусида янада яқин алоқада бўлишга келишиб олган.

Путин ва Ким ўртасидаги қўнғироқ, Россия президентининг АҚШ етакчиси Дональд Трамп билан Аляскадаги учрашувидан бир неча кун олдин бўлиб ўтди. Кузатувчилар буни Москва ва Пхеньян муносабатларининг мустаҳкамланаётганидан далолат деб баҳоламоқда.

Жанубий Корея Миллий разведка хизмати маълумотларига кўра, Шимолий Корея Украинадаги можарода Россияга ёрдам бериш учун 10 мингдан ортиқ ҳарбий йўллаган ва яна минглаб аскарларни юбориш режасини тайёрлаган.

Апрель ойида Путин Курск вилоятини тўлиқ назоратга олганини эълон қилган, аммо Украина расмийлари бу маълумотни рад этган.

Жума куни Аляскада бўлиб ўтадиган саммитда Дональд Трампнинг Россия етакчисини тинчлик келишувига рози бўлишга ундаши кутилмоқда. Шунингдек, АҚШ президенти Москва ва Киев ўртасида бир қатор ҳудудлар бўйича келишув зарурлигини эслатган.