Фото: Халқ сўзи

Айни кунларда икки томонлама ҳамкорлик муносабатларини янада яхшилаш мақсадида Фарғона вилояти ҳокими ўринбосари – вилоят инвестициялар ва ташқи савдо бошқармаси бошлиғи Иқболжон Эргашев Покистон Ислом Республикасида бўлиб турибди.

Ташриф доирасида Лахор шаҳрида покистонлик йирик ишбилармонлар билан амалий музокаралар олиб борилди. Хусусан, Покистоннинг қурилиш соҳасида 40 йиллик тажрибага эга “Kingcrete” холдинг компанияси асосчилари билан учрашувда Фарғона вилояти қурилиш соҳасига инвестиция киритиш масаласи муҳокама қилинди. Натижада “Kingcrete” холдинги билан Фарғона шаҳрида барпо этилаётган Экошаҳар ва бошқа лойиҳалар учун 20 млн. доллар инвестиция киритиш юзасидан келишувга эришилди.

Бугунги кунда умумий активлари қиймати 10 млрд. доллардан зиёд бўлган “Nishat Group” холдинги асосчиси Миан Муҳаммад Манша билан суҳбатда Фарғона вилоятида юқори маркали цемент ишлаб чиқариш, аралашма ипли мато заводини қуриш, хусусий банк очиш ва 4-5 юлдузли меҳмонхоналар қуриш лойиҳалари кўриб чиқилди. Ушбу холдинг текстиль, тўқимачилик, банк иши, энергетика соҳаси, меҳмонхона бизнесини қамраб олган бўлиб, АҚШ, Хитой, Канада, БАА, Буюк Британия каби давлатларда 23 та компаниялари фаолият кўрсатади.

Шунингдек, Покистоннинг юз турдан ортиқ дори воситалари ишлаб чиқарувчи “Biz Pharmaceutical”, ахборот коммуникация технологиялари соҳасига ихтисослашган “Strategic Advisory Partners” компаниялари раҳбарлари билан ҳам ўтган учрашувларда ўзаро ҳамкорлик истиқболини таъминлаш бўйича дастлабки қадамлар ташланди.

Фарғона вилояти ҳокими ўринбосари 2 март куни Исломобод шаҳрида ўтказиладиган Ўзбекистон-Покистон бизнес-форуми ҳамда савдо-иқтисодий, илмий-техникавий ҳамкорлик бўйича Ўзбекистон-Покистон Ҳукуматлараро комиссиясининг йиғилишида иштирок этиши режалаштирилган.

Ботир Мадиёров, «Халқ сўзи».