Тошкент шаҳрида кучли таъсир қилувчи дори воситаларини сотган шахслар ушланди. Бу ҳақида Иқтисодий жиноятларга қарши курашиш департаменти хабар берди.

Билдирилишича, ўтказилган тезкор тадбир давомида шубҳа остига олинган фуқаро М.А. кўздан кечирилганда, унинг ёнида 4 минг дона кучли таъсир қилувчи восита борлиги аниқланган. Ушбу маҳсулотлар ашёвий далил сифатида расмийлаштириб олинган.

Шу каби яна бир ҳолат департаментнинг Янгиҳаёт тумани бўлими бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда ҳам аниқланган.

Унга кўра, муқаддам судланган фуқаро М.А. таркибида кучли таъсир қилувчи моддалари мавжуд бўлган 11 дона «Тропикамид» ва «Прегабалин» номли дори воситаларини фуқаро М.И.га 2 миллион сўмга сотган вақтида ашёвий далиллар билан ушланган.

Ҳозирда мазкур ҳолатлар юзасидан Жиноят кодексининг 251-1-моддаси (гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи моддаларни тарғиб қилувчи маҳсулотни тайёрлаш, тарқатиш, реклама қилиш, намойиш этиш ёки бундай моддаларни ёхуд заҳарли моддаларни қонунга хилоф равишда муомалага киритиш) билан жиноят ишлари қўзғатилиб, тергов ҳаракатлари ўтказилмоқда.