Пешку туманидаги кўҳна Валфажр қишлоғи тарихида дастлабки давлат мактабгача таълим ташкилоти ўз фаолиятини бошлади. Бу шу ҳамда ён-атрофдаги қишлоқларда яшовчи уч мингдан зиёд аҳолини хурсанд қилди, албатта.

— Ҳудудда хусусий боғчалар бор, аммо улардаги қатнов ўринлари эҳтиёжни қондира олмаётган эди, — дейди янги муассаса раҳбари Шоҳида Ғаниева. — Қолаверса, 47-давлат мактабгача таълим ташкилотимиз биноси замонавий талабларга мос тарзда қурилгани билан эътиборни тортади. У қўшқаватли, болажонларнинг рисоладагидек таълим-тарбия олишлари учун жуда қулай. Давлат ва жамоат ташкилотлари, қишлоқ фаоллари томонидан ҳудудда мўъжаз боғ барпо этилгани ҳам айни муддао бўлди.

120 ўринга мўлжалланган муассаса хоналари кенг ва ёруғ. Кичкинтойларнинг мириқиб ўйнашлари, машғулотлар орқали маълум бир кўникмаларга эга бўлишлари, юртимизга, она табиатга меҳр-муҳаббат руҳида тарбияланишлари учун ҳавас қилса арзигулик шарт-шароитлар яратилган. Эндиликда ҳамма гап муассаса жамоасининг шу қулайликлардан оқилона фойдаланишида.

Айтмоқчи, янги муассасанинг иш бошлаши билан вилоятнинг чекка ҳудуди саналган Пешкуда мактабгача таълим ташкилотларининг сони 194 тага етди. Айни пайтда туман бўйича 3–7 ёшли болажонларнинг 93,4 фоизи боғчаларга қамраб олинган.

Истам ИБРОҲИМОВ, «Халқ сўзи».