Тошкентда ўтказилаётган Парламентлараро иттифоқнинг 150-мажлиси — бу фақат парламентлар тарихи учун нишонланаётган сана эмас. Бу — ижтимоий тараққиёт ва адолатни таъминлашда давлат институтлари ҳамда фуқаролик жамиятининг умумий масъулиятини яна бир бор тасдиқлашдир. Бугунги ўзаро боғлиқ дунёда бу мақсадларга фақат қонунчилик йўли билан эришиб бўлмайди — улар ҳаёт тарзига айланиши, жамиятнинг барча даражаларида амалга татбиқ этилиши ва ҳис этилиши шарт.

Ўзбекистонда демократик муҳит босқичма-босқич шаклланмоқда. Конституциявий ислоҳотлар маҳаллий кенгашларнинг ваколатларини кенгайтириб, парламент назоратини кучайтирди. Энг муҳими, сиёсий қарорлар қабул қилиш жараёнларида жамоатчилик иштирокини кенгайтирди ва аввал четда қолган аҳоли қатламларига ўз овозини эшиттириш имконини берди. Бу ютуқ — парламентлар ва фуқаролик жамияти ўртасидаги ҳамкорликнинг кучини тасдиқловчи ёрқин мисолдир.

Бироқ ижтимоий адолат фақат иштирок этиш имконияти билан эмас, балки тенгликка эришиш орқали таъминланади. Ҳақиқий адолат суд залларидагина эмас, балки барчани қамраб олувчи таълим, сифатли тиббиётга етарли имконият, гендер тенглиги ва эҳтиёжманд тоифаларни қўллаб-қувватлаш орқали намоён бўлади. Қонунчилик тизими имкониятлар тенглигини таъминлаш ва инсон қадрини ҳимоя қилиш воситасига айланиши лозим.

Очиқлик ва жавобгарлик — адолат сари ҳаракатда асосий таянчлардир. Ўзбекистондаги ислоҳотлар фуқаролик назорати ва очиқ маълумотлар сиёсатига катта аҳамият қаратмоқда. Бироқ, институционал ишонч фақат парламентлар, фуқаролик жамияти ва мустақил оммавий ахборот воситалари ўртасидаги ҳамкорлик орқали мустаҳкамланади. Биз биргаликда ҳалоллик ва жамоат ишончи маданиятини шакллантиришимиз керак.

Парламентлараро иттифоқ каби халқаро майдонлар умумий ўрганиш ва биргаликда ҳаракат қилиш учун кучли платформадир. Улар бизга қийинчиликлар — камбағаллик, тенгсизлик ёки иқлим ўзгариши — даврида бирор мамлакат ёлғиз ҳаракат қилиши мумкин эмаслигини эслатиб туради. Барқарор ривожланиш мақсадларини чегаралардан ошган ҳамкорлик орқали рўёбга чиқариш орқали биз ижтимоий адолатнинг ҳар бир хонадонга етиб боришини таъминлай оламиз. Бу — халқаро ҳамкорликнинг салоҳиятидир.

“Тараққиёт стратегияси” маркази сифатида биз ислоҳотлар жараёнида фуқаролар овозини кучайтиришга қатъий содиқмиз. Илмий таҳлиллар, мунтазам мониторинг, очиқ мулоқотлар ва самарали тарғибот орқали фуқаролик жамиятини кузатувчи эмас, балки инклюзив бошқарувнинг ҳаракатлантирувчи кучи ва жамоат қадри яратувчиси сифатида намоён қилишни мақсад қилганмиз. Бу фаолиятимиз — парламентлар ва фуқаролик жамияти ҳамкорлигига бўлган ишончимизнинг ифодасидир.

Элдор ТУЛЯКОВ,

“Тараққиёт стратегияси” маркази ижрочи директори.