Бухорода туғилиб ўсган ва тақдир тақозаси билан Францияда ўқиб, бизнес соҳасида олий таълим олган Саиджон Мақсудов кўҳна шаҳарда туристик ахборот маркази очиш ташаббускори бўлди. Унинг бундан бир йил муқаддам тайёрлаган бизнес лойиҳаси ниҳоят тўла-тўкис амалга ошди. Бухоронинг эски шаҳар қисмида “Chalet touristinfo.Uz” деб номланган сайёҳлик ахборот маркази ва қаҳвахона қад ростлади.

— Шаҳар меҳмонларининг зарур ахборотга эга бўлишлари учун бундай марказ жуда керак, деб ҳисоблаймиз, — дейди С. Мақсудов. — Чунки ҳар қандай турист ўзи ташриф буюрган маскан ҳақида кўпроқ маълумотга эга бўлишни истайди. Марказимиз худди шу вазифани ўтайди. Ўзимнинг Франциядаги фаолиятимга келсак, Парижда таҳсил олгач, отамнинг қўллаб – қувватлашлари, дуолари билан шу шаҳарнинг учта кварталида миллий таомлар ресторанларини очишга муваффақ бўлдим. Мамлакатимиз Президентининг «Хорижда истиқомат қилаётган ватандошлар билан ҳамкорлик соҳасида Ўзбекистон Республикаси давлат сиёсатини янада такомиллаштириш чора-тадбирлари тўғрисида»ги қарори яхши бир ниятимни рўёбга чиқариш сари йўл очди. Мамлакатимизнинг Франциядаги элчихонаси билан боғланиб, Бухорода шундай марказ очиш мақсадимни баён этдим. Пировардида Европада ишлаб орттирган оилавий даромадимиздан 200 минг АҚШ долларини ушбу лойиҳа рўёби учун сарфладик. Келгусида она-шаҳримда «Меҳмон уйлари» қуриш ниятидаман.

Айтиш жоизки, туристик ахборот маркази ва қаҳвахона қурилиши шарофати билан 20 тага яқин янги иш ўрни ҳам яратилди. Марказнинг тантанали очилиш маросимида вилоят ва шаҳар мутасаддилари қатнашиб, тадбиркорнинг фаолиятига омад тиладилар.

Истам ИБРОҲИМОВ,
«Халқ сўзи»