Ўзбекистоннинг Жанубий Африка Республикасидаги биринчи элчиси тайинланди. Бу ҳақда ЖАР Президенти матбуот хизмати хабар берди.

Қайд этилишича, кеча, 2 октябрь куни Ўзбекистоннинг Жанубий Африка Республикасидаги биринчи Фавқулодда ва мухтор элчиси Ашраф Хўжаев мамлакат Президенти Сирил Рамафосага ишонч ёрлиқларини топширган. Мазкур учрашув Претория шаҳрида жойлашган Сефако Макгато президент меҳмонхонасида бўлиб ўтган.

Маълумот учун, Ашраф Хўжаев 2024 йил 11 февралда Ўзбекистоннинг Қатардаги фавқулодда ва мухтор элчиси этиб тайинланган. 44 ёшли дипломат Тошкент давлат шарқшунослик институти, Ўзбекистон Миллий университети, Пекин университетини тамомлаган. Иқтисодиёт фанлари номзоди (ПҳД) илмий даражасига эга.

У Ташқи ишлар вазирлиги тизимидаги фаолиятини 2005 йилда референт сифатида бошлаган. Ўтган йиллар давомда у вазирлик марказий аппаратида, шунингдек, Нью-Йорк шаҳридаги Ўзбекистоннинг БМТдаги доимий ваколатхонасида ва Буюк Британиядаги элчихонада турли лавозимларда ишлаган.

Хўжаев 2018 йилдан ТИВ Иқтисодий дипломатия департаменти бошқарма, бош бошқарма бошлиғи ва директори лавозимларида ишлаб келган.