Ҳозирда Америка Қўшма Штатларида давом этаётган Клублар ўртасидаги Жаҳон чемпионатида ўзбекистонлик ҳакамлар ҳам фаол иштирок этмоқда. Хусусан, тажрибали рефери Илгиз Танташев навбатдаги учрашувга тайинланди.

Унга кўра, Илгиз Танташев ва Андрей Сапенко 5 июль куни бўлиб ўтадиган мусобақанинг 1/4 финал учрашувида ишлайди. Мазкур беллашувда Бразилиянинг «Палмейрас» ва Англиянинг «Челси» жамоалари ўзаро тўқнаш келади.

Учрашув ҳакамлари таркиби қуйидагича шаклланган: бош ҳакам — Алиризо Фағони (Австралия), қанот ҳакамлари — Антон Шетинин ва Эшли Бечим (иккиси ҳам Австралиядан), захира ҳаками — Илгиз Танташев (Ўзбекистон) ва захира ҳаками ёрдамчиси — Андрей Сапенко (Ўзбекистон).

Маълумот учун, Илгиз Танташев бошчилигидаги ҳакамлар бунгача Клублар ўртасидаги Жаҳон чемпионатида учта ўйинда фаолият олиб борди. Жумладан, у мусобақанинг гуруҳ босқичидаги «Флуминенсе» — «Боруссия Дортмунд» ва «Интер» — «Ривер Плейт» жамоалари ўртасидаги баҳсларда бош ҳакам сифатида ишлади. Бундан ташқари, «Интер Маями» — «Порту» ўйинида эса захира ҳаками сифатида фаолият юритди.

Шу тариқа, Илгиз Танташев бошчилигидаги ўзбекистонлик ҳакамлар жаҳон миқёсидаги йирик турнирда ўз салоҳияти ва тажрибасини кўрсатишда давом этмоқда.