Фото: Архив сурат

2025 йил июль ойида Ўзбекистон автомобил бозорида сотувлар сезиларли ошди. Бу ҳақда Иқтисодий тадқиқотлар ва ислоҳотлар маркази (ИТИМ) хулосасида маълум қилинди.

Маълумотларга кўра, ушбу ойда 116,8 мингта автотранспорт воситаси сотилган. Бу июнь ойига нисбатан 27 фоизга кўп бўлиб, 2024 йил январидан бери энг юқори кўрсаткич ҳисобланади.

ИТИМ экспертларига кўра, енгил автомобиллар сегментидаги ўсиш аҳоли харид қобилияти тикланаётганини ва талабнинг ҳудудлар бўйича кенгаяётганини кўрсатмоқда.

Жами енгил автомобиллар сотуви қарийб 100 мингтага етди, бу ўтган ойга нисбатан 25 фоиз кўпдир. Энг катта ўсиш Тошкент вилоятида (51%), Наманган вилоятида (49%) ва Хоразм вилоятида (40%) қайд этилди.

Бирламчи бозорда ҳам ижобий динамика кузатилди. Яъни, июль ойида янги енгил автомобиллар сотуви 38,2 фоизга ошиб, 38,4 мингтага етди.

Шу жумладан, маҳаллий ишлаб чиқарилган янги енгил автомобиллар ҳали ҳам бозорда устувор ўринни эгаллаб, 32,9 мингта сотув билан 38,6 фоиз ўсиш қайд этди.

Чет элда ишлаб чиқарилган янги енгил автомобиллар сотуви ҳам ўсиш қайд этиб, 5,4 мингтага етди. Бу июнь ойига нисбатан 35,8 фоиз кўпдир.