Фото: Президент Матбуот хизмати

Ўзбекистон Республикаси Президенти Шавкат Мирзиёев 6 июль куни Туркий давлатлар ташкилотининг норасмий саммити доирасида Венгрия Бош вазири Виктор Орбан билан учрашув ўтказди. Бу ҳақда Ўзбекистон президенти матбуот хизмати хабар қилди.

Учрашувда Ўзбекистон – Венгрия кўп қиррали муносабатларининг долзарб масалалари кўриб чиқилди.

«Мамлакатларимиз ўртасидаги стратегик шериклик ва амалий ҳамкорлик изчил ривожланиб бораётгани мамнуният билан қайд этилди. Барча даражаларда фаол мулоқотлар давом этмоқда. Май ойида Тошкент шаҳрида қўшма Ҳукуматлараро комиссия йиғилиши ва бизнес форуми самарали ўтказилди», дейилади хабарда.

Қайд этиш лозимки, икки мамлакат ўртасида кейинги йилларда товар айирбошлаш ҳажми қарийб икки баробар ошди, қўшма лойиҳа ва корхоналар сони ҳам кўпаймоқда. Жорий йилнинг 30 июнидан Тошкент ва Будапешт ўртасида тўғридан-тўғри авиақатновлар тикланди.

Шунингдек, учрашувда Туркий давлатлар ташкилоти ва Европа Иттифоқи доирасидаги ҳамкорликнинг долзарб масалалари юзасидан ҳам фикр алмашилган.

Аввалроқ, Шавкат Мирзиёев Эрон Ислом Республикасининг янги президентини табриклаганди.