Ўзбекистон миллий терма жамоаси футбол бўйича 2026 йил АҚШ, Мексика ва Канадада ўтказиладиган жаҳон чемпионати саралаш босқичида муваффақиятли иштирок этиб, тўрт йилликнинг нуфузли мусобақасида қатнашиш ҳуқуқини қўлга киритди.

Футболчиларимизнинг бу ютуқлари нуфузли хориж нашрлари, экспертлар ва кенг жамоатчилик вакиллари томонидан тарихий натижа сифатида эътироф этилмоқда. Бу бежиз эмас, албатта. Чунки ҳар тўрт йилда Халқаро футбол федерациялари ассоциацияси (ФИФА) томонидан ташкил этиладиган ушбу нуфузли мусобақада ҳар бир аъзо давлат ўз мамлакати миллий жамоасини кўришни истайди. Аммо унга иштирок этиш учун мураккаб саралаш босқичларидан ўтиш керак. Бугунгача ФИФАга аъзо 211 давлатдан 79 тасининг бош жамоаларига бу насиб этган, холос. Энди улар сафи терма жамоаси билан бойиди. Бу барчамизга чексиз ифтихор бағишлайди.

Ўзбекистон, футбол бўйича жаҳон чемпионатига хуш келибсиз!

ФИФА президенти Жанни Инфантино Ўзбекистон терма жамоасининг жаҳон чемпионати саралаш босқичидаги муваффақиятидан сўнг халқимизни ушбу ғалаба билан табриклади.

“Ўзбекистон, футбол бўйича жаҳон чемпионатига хуш келибсиз! Сизни Канада, Мексика ва АҚШда бўлиб ўтадиган 2026 йилги жаҳон чемпионатига тарихий йўлланма олганингиз билан табриклашдан мамнунман. Сиз 1994 йилда ФИФАга аъзо бўлганингиздан бери ажойиб ўйин кўрсатдингиз, Олимпия ўйинларига йўлланмани қўлга киритдингиз. Ёшлар ўртасидаги бир неча жаҳон чемпионатларида иштирок этдингиз. Келгуси ёзда финал босқичида қатнашиш учун бутун дунё бўйлаб мухлислар “Оқ бўрилар”нинг глобал томошабинлар олдида чиқишларини интиқлик билан кутишади”, дейилади Инфантинонинг мурожаатида.

“Reuters” ахборот агентлиги “Ўзбекистон БАА билан дурангдан сўнг илк бор жаҳон чемпионатига чиқди” сарлавҳали мақола чоп этди.

“Пайшанба куни Абу-Дабида Бирлашган Араб Амирликлари билан 0:0 ҳисобида дуранг ўйнаган Ўзбекистон саккизинчи уринишида илк бор жаҳон чемпионати финал босқичига йўлланма олди. Дарвозабон Ўткир Юсупов иккинчи бўлимда учта сейвни амалга оширди. Ўзбекистонликлар Эрон билан бирга Осиёнинг “А” гуруҳидан жаҳон чемпионатига чиқиш учун керакли натижани қўлга киритди”, деб ёзилади мақолада.

“ESPN” телеканалининг сайтида ҳам Ўзбекистоннинг ёрқин ғалабасига бағишланган мақола чоп этилди. “ЖЧ — 2026: Иордания, Жанубий Корея, Ўзбекистон” сарлавҳали мақолада “Иордания ва Ўзбекистон пайшанба куни илк бор эркаклар ўртасидаги жаҳон чемпионати финал босқичига йўлланма олди... Абу-Дабида Бирлашган Араб Амирликлари билан 0:0 ҳисобида дуранг ўйнаган Ўзбекистон Эрондан кейин иккинчи ўринни эгаллаши учун етарли бўлди.

Якунда Марказий Осиё терма жамоаси ва мухлислар биргаликда байрам қилишди. Дарвозабон Ўткир Юсуповга бир қатор муҳим сейвлар учун миннатдорлик билдиришди”, дея қайд этилади мақолада.

Жаҳонга машҳур Франциянинг “Agence France-Presse” ахборот агентлиги ҳам Ўзбекистоннинг тарихий ғалабаси ҳақида салмоқли мақолани ўз муштарийларига ҳавола қилди.

“Ўзбекистон мураббийи: Бутун халқимиз учун тарихий жаҳон чемпионати йўлланмаси”, сарлавҳали мақолада миллий терма жамоамиз бош мураббийи Темур Кападзенинг фикрларига асосий урғу берилган. “Бирлашган Араб Амирликларидаги 0:0 ҳисобидаги дуранг Ўзбекистон учун 2026 йилда Шимолий Америкада бўлиб ўтадиган жаҳон чемпионатига йўлланмани қўлга киритиш учун етарли бўлди.

Ўзбекистон терма жамоаси бош мураббийи Марказий Осиё терма жамоасини ўз тарихида илк бор жаҳон чемпионатига олиб чиққанидан кейин “бу ғалаба барчамизники”, деди.

“Биз узоқ йўлни босиб ўтдик ва муҳим натижага эришдик. Биз бутун халқимизни ва Президентимизни табриклаймиз. Кеча ва бугун телефон қўнғироқлари тўхтагани йўқ. Ҳамма бизни қўллаб-қувватлашини ва биз учун дуо қилишини айтди, ғалаба тилаклари биз учун катта илҳом бўлди. Футболчиларимиз ҳар бир ўйинда қатъият кўрсатишди, бор кучларини ишга солишди, шунинг учун ҳам биз натижага эришдик”, — деди Тимур Кападзе.

Давлат томонидан қўллаб-қувватланаётган Ўзбекистон Осиёнинг футболи энг тез ривожланаётган давлатларидан бири ҳисобланади. У дунё рейтингида 57-ўринни эгаллаб турибди”, деб таъкидланади мақолада.

“foxsports.com” спорт янгиликларига ихтисослаштирилган интернет сайтида ҳам ўзбек футболининг юксак ғалабасига бағишланган мақолани ўқувчиларига тақдим этди. “Учта жамоа — Ўзбекистон, Иордания ва Жанубий Корея келаси йили Шимолий Америкада бўлиб ўтадиган 48 жамоа иштирокидаги турнирга йўлланмани қўлга киритди. Ўзбекистон ва Иордания учун бу биринчи марта жаҳон чемпионатига чиқиши бўлди. Пайшанба куни Бирлашган Араб Амирликлари билан учрашувда Ўзбекистон дарвозабон Ўткир Юсуповнинг иккинчи бўлимдаги ўйини эвазига зарур бўлган натижани қўлга киритди. Ҳозирда 10 та жамоа – Аргентина, Япония, Иордания, Янги Зеландия, Эрон, Жанубий Корея ва Ўзбекистон ҳамда мезбонлар – АҚШ, Канада ва Мексика жаҳон чемпионати йўлланмасига эга”, деб келтирилади мақолада.

“beinsports.com” сайтида берилган “Ўзбекистон ва Иордания терма жамоалари жаҳон чемпионатига йўлланмани қўлга киритишди” сарлавҳали мақолада ҳам шундай дейилади: Ўзбекистон ва Иордания терма жамоалари ўз тарихида илк бор жаҳон чемпионати финал босқичига йўлланмани қўлга киритди.

Ўзбекистон Бирлашган Араб Амирликлари билан голсиз дуранг натижа қайд этиб, Аргентина, Эрон, Япония ва Янги Зеландиядан кейин АҚШ, Мексика ва Канадада ўтказиладиган турнирда иштирок этиш ҳуқуқини қўлга киритган бешинчи давлатга айланди.

Тимур Кападзе шогирдлари ОФК саралаш 3-босқичининг “А” гуруҳида Эрондан кейин иккинчи ўринни қўлга киритиб, ўз йўлланмасини эга бўлди. Абу-Дабида учинчи ўриндаги БАА билан 0:0 ҳисобидаги дуранг Ўзбекистонни атиги бир ўйин қолганида энг яқин таъқибчисидан тўрт очкога ўзиб кетди. Бу уларнинг 1991 йилда мустақил давлат бўлганидан бери биринчи марта жаҳон чемпионати финалида иштирок этишини таъминлади.

ТАСС ахборот агентлиги томонидан тақдим этилган “Ўзбекистон илк бор ФИФА Жаҳон чемпионатига йўлланма олди” сарлавҳали мақолада “Ўзбекистон тарихида илк бор миллий терма жамоа футбол бўйича жаҳон чемпионатига йўлланма олди. Пайшанба куни ўзбекистонлик футболчилар Бирлашган Араб Амирликлари терма жамоасига қарши саралаш баҳсида голсиз дуранг ўйнади. Ўзбекистон 18 очко билан “А” гуруҳида иккинчи ўринни эгаллаб турибди. Ундан кейинги ўринда 14 очко тўплаган БАА терма жамоасининг ҳозирда Ўзбекистондан ўзиб кетиш имконияти нолга тенг”, дейилади.

sports.kz интернет сайтининг “Ўзбекистон тарихида илк бор жаҳон чемпионатига йўлланма олди” сарлавҳали мақоласида Ўзбекистон терма жамоаси ўз тарихида илк бор жаҳон чемпионатига йўлланмани қўлга киритиб, тарихий муваффақиятга эришгани ёзилган. “Тимур Кападзе шогирдлари Осиё саралаши учинчи босқичининг 9-турида БАА билан меҳмонда дуранг ўйнади – 0:0. Абу-Дабидаги “Ал Наҳаён” стадионида бўлиб ўтган учрашув голсиз якунланган бўлса-да, Ўзбекистон жамоасига муҳим бир очко келтирди. Энди Ўзбекистон ҳисобида 18 очко бор, бу гуруҳ босқичи якунланишига бир тур қолганда “А” гуруҳида камида иккинчи ўринни ва жаҳон чемпионатига тўғридан-тўғри йўлланмани кафолатлаш имконини беради”, дейилган мақолада.

Россиялик собиқ футболчи Валерий Кечиновнинг айтишича, жаҳон чемпионатига чиқиш Ўзбекистон учун жуда катта муваффақият... Турли йилларда яхши имкониятлар бўлмаган, лекин натижа келмаган. Мамлакатда жуда кучли ва иқтидорли йигитлар бор.

Ўзбекистонда футбол азалдан машҳур бўлган. Иқлим йил бўйи футбол ўйнашга имкон беради, йигитлар футболга қизиқишади. Энди бундан ҳам кўпроқ натижалар бўлиши табиий. Бу ҳар доим мамлакат футболи ривожига яхши таъсир кўрсатади.

Фазлиддин АБИЛОВ, «Халқ сўзи» тайёрлади.