АҚШнинг Вашингтон шаҳрида, Оқ уйдан унча узоқ бўлмаган ҳудудда афғонистонлик эркак отишма уюштирди. Оқибатда икки нафар Миллий гвардия хизматчиси оғир яраланди. Бу ҳақда махфий хизмат вакилига таяниб, “The Washington Post” хабар берди.

Полиция маълумотларида келтирилишича, кеча, 26 ноябрь куни кундуз вақтида қуролланган шахс Миллий гвардия аъзоларига ўқ узган ва қисқа вақт ичида атрофдаги бошқа гвардиячилар томонидан қўлга олинган. Ҳодиса шаҳар мэри томонидан “мақсадли ҳужум” сифатида баҳоланди.

АҚШ Ҳомийлик ва хавфсизлик департаменти гумонланувчи сифатида 29 ёшли Афғонистон фуқароси Раҳманулло Лақамални кўрсатди. Президент Дональд Трамп уни 2021 йил сентябрда мамлакатга кирганини маълум қилди ва бу қилмиши учун “энг оғир жазо” қўлланилишини билдирди.

Расмийларга кўра, ҳужум Вашингтон марказидаги Фаррагут Сквер метро бекати яқинида, тахминан 14:15 да содир бўлган. Ҳужум оқибатида икки гвардиячи оғир жароҳат олган, шунингдек, гумонланувчининг ўзи ҳам ўқдан жароҳатланган.

Отишмадан сўнг Вашингтондаги Рейган миллий аэропортида парвозлар вақтинча тўхтатилди. Пентагон раҳбари Пит Хегсетх маълум қилишича, президент Трамп пойтахт хавфсизлигини кучайтириш учун яна 500 нафар Миллий гвардиячини юборишни буюрган. Ҳозирда Вашингтонда турли штатлардан жами 2,2 мингга яқин гвардиячи хизмат қилмоқда.

Расмий статистикага кўра, Миллий гвардия кузатувини кучайтирилганидан бери пойтахтда жиноятчилик даражаси пасайган.