Архив сурат

2022 йилнинг 15 июнь куни пойтахтимиздаги Миллий матбуот марказида «Олмалиқ КМК» АЖдаги масъуллари иштирокида матбуот анжумани ташкил этилди. 

Тадбирда йирик саноат корхонаси ҳисобланган «Олмалиқ кон-металлургия комбинати» АЖнинг жорий йил 5 ойи якунлари ҳамда ишлаб чиқарилган маҳсулотларнинг экспорти бўйича амалга оширилган ишлар, комбинатнинг экспорт салоҳияти ҳақида маълумот берилди.

Маълум қилинишича, ўтган 5 ойда комбинатда 13 640,4 млрд сўмлик маҳсулотлар ишлаб чиқарилиб, режа 121,4 фоизга бажарилган ҳолда ўтган йилнинг шу даврига нисбатан ўсиш суръати 115,7 фоизни ташкил этган. Албатта ушбу натижа нафақат «Олмалиқ кон-металлургия комбинати» учун, балки мамлакатимиз иқтисодиёти ривожида ҳам муҳим аҳамиятга эга.

Соҳа мутахассисларининг таъкидлашича, корхона иқтисодий салоҳияти билан бирга экспорт кўрсаткичлари ҳам йилдан-йилга ўсиб бормоқда. Хусусан, 2017 йилда корхона ташқи бозорга 643,1 млн. долларлик маҳсулот етказиб берган бўлса, 2021 йилда экспорт кўрсаткичи 821,5 млн. долларни ташкил қилган. Жорий йилда ҳам экспорт прогноз кўрсаткичларининг ошиғи билан бажарилиши кутилмоқда.

Яна бир аҳамиятли жиҳати шундаки, корхонанинг экспорт географияси ғоятда кенг. Озарбайжон, Арманистон, Афғонистон, Белорус, Ҳиндистон каби дунёнинг 20 дан ортиқ давлатларида ОКМК маҳсулотларининг истеъмолчилари бор.

Тадбирда журналистлар ўзларининг қизиқтирган саволларга мутахассислардан батафсил жавоблар олишди.

Машҳура ИНОЯТОВА, Маржона ЗОКИРОВА,

ЎзДЖТУ талабалари.