Ахборот ва оммавий коммуникациялар агентлигида Бадиий академия раҳбарияти ва мутасаддилари иштирокида “Бадиий таълимга оид масалалар ва истиқболдаги вазифалар” мавзусида матбуот анжумани бўлиб ўтди.

Унда бадиий таълим сифатини оширишга қаратилган ишлар, Камолиддин Беҳзод номидаги Миллий рассомлик ва дизайн институтига тест синовларисиз, ижодий имтиҳонлар орқали қабул қилиш амалга оширилаётгани маълум қилинди.

“Бадиий таълим йўналишида яна бир муҳим қадамлардан бири — тасвирий ва амалий санъат соҳасида олий маълумотга эга бўлмаган, лекин ўзининг ноёб истеъдоди ва маҳорати билан танилиб, халқ эътирофига сазовор бўлган халқ рассомлари, Бадиий академиянинг академиклари, “Ўзбекистон халқ устаси” ва соҳа бўйича бошқа давлат мукофотлари ва шарафли унвонларига сазовор бўлган мутахассислар истисно тариқасида олий ўқув юртларида дарс бериш ҳуқуқига эга бўлди”, — деди Академия Бош илмий котиби Феруза Обиджонова.

Таъкидланишича, бадиий таълим доирасида бир қанча қўшма дастурлар амалга оширилган, хусусан, Миллий рассомлик ва дизайн институти ҳамда Чанапатана Халқаро дизайн институти, Жанубий Кореянинг Кемёнг университети билан ҳамкорликда “Дизайн либос ва газламалар” ва “Интерьерни лойиҳалаш” йўналишларида қўшма факультетлар очилган.

Мутасаддилар ҳозирда Бадиий академия тизимида жами 16 та таълим муассасаси — 1 та институт, 4 та ихтисослаштирилган санъат мактаби ҳамда 11 та ихтисослаштирилган санъат мактаб-интернати мавжуд эканини билдирди.

Жаҳондаги етакчи бадиий академиялар билан илғор тажрибалар алмашиш мақсадида ҳамкорлик алоқаларини ривожлантиришда “Ўзбекистон Бадиий академияси фаолиятини ривожлантириш ва янада такомиллаштиришга доир қўшимча чора-тадбирлар тўғрисида”ги Президент қарори муҳим асос яратиб бергани алоҳида қайд этилди.