Фото: scitechdaily.com

НАСАнинг «Lunar Reconnaissance Orbiter» аппарати Ой юзаси остида яширин туннеллар мавжудлигини аниқлади. Бу ҳақда «Nature Astronomy» журналида чоп этилган мақолада сўз боради.

Қайд этиш керакки, Италиянинг Тренто университети ҳомийлигидаги халқаро олимлар гуруҳи «Mare Tranquillitatis» ҳудудида (Ойдаги ҳудуд номи – таҳр.) узунлиги бир неча километрга чўзиладиган туннеллар тармоғи борлигини кашф этишди. Билдирилишича, улар Ернинг табиий йўлдошида лавалар бўлганлигини англатиши мумкин. Шу тариқа Олимлар биринчи марта Ой сатҳидан пастда тахмин қилинган туннель борлигини тасдиқладилар.

Тренто университети профессори Лорензо Бруззоне миссиясида «Mini-RF» асбобидан олинган радар маълумотлари Ер ости ғорини кўрсатадиган аксларни аниқлашга ёрдам берганини таъкидлади.

«Ушбу кашфиёт Ой тадқиқотларидаги муҳим босқични белгилайди», дейди профессор.

«Mini-RF» бош тадқиқотчиси, Жонс Хопкинс университети амалий физика лабораторияси олими Уэс Паттерсон Ойни тадқиқ қилиш учун радар маълумотларини тўплашнинг муҳимлигини таъкидлади.

Бу янгилик фундаментал илмий саволларга жавоб беришда масофадан зондлаш маълумотларининг аҳамиятини ҳам кўрсатиб бера олди. Келажакдаги орбитал миссиялар Ойнинг ер ости қатлами ҳақида кўпроқ маълумот бериши мумкин. Ушбу жараёнда Падуа университети ва «La Venta Geographic Explorations APS» тадқиқотчилари ҳам иштирок этди.

Ушбу топилмалар келажакдаги ой миссиялари учун муҳим аҳамиятга эга. Ойнинг сирт шароитлари экстремал бўлиб, ҳарорат кундузи 127 даражадан кечаси -173 даражагача бўлиши мумкин. Ер ости ғорлари инфратузилмани қуриш учун хавфсиз жойларни таклиф қилиши, ҳароратнинг ҳаддан ташқари ўзгариши, радиация ва метеорит таъсиридан ҳимоя қилиши ва шу билан инсоннинг доимий изланишларини қўллаб-қувватлаши мумкинлиги айтилмоқда.

Аввалроқ, Марс ҳақида айрим ҳақиқатлар фош этилиб, «Қизил сайёра»нинг ўтмишда субарктик иқлимга эга бўлгани ҳақида хабар берилганди.