Кеча тунда Европа Чемпионлар лигасининг дастлабки ярим финалчилари номи маълум бўлди. Каталониянинг «Барселона» клуби сафарда Дортмунднинг «Боруссия» клубига қарши саф тортди. Қийин кечган учрашувда мезбонлар 3:1 ҳисобида ғалаба қозонган бўлсада, икки ўйин натижасига кўра 3:5 ҳисобида Испания клуби турнирнинг ярим финал босқичига йўл олди. Ҳанси Флик шогирдлари жорий йил бошидан буён илк мағлубиятини қабул қилиб олишди. Шу тариқа Каталония клубининг 24 ўйинлик мағлубиятсиз сериясига Дортмундда чек қўйилди.

Ярим финал йўлланмаси учун курашган Англиянинг «Астон Вилла» ҳамда Франциянинг «ПСЖ» жамоалари ўртасидаги баҳс ҳам шиддатли кечди. Ушбу клублар ўртасидаги дастлабки ўйин 3:1 ҳисобида парижликларнинг қўли баланд келган эди. Жавоб ўйинида Англия клубига камбек амалга ошириши учун бир гол етмади холос. Баҳс 3:2 ҳисобида мезбонлар устунлигида якунланди, бироқ иккала ўйин натижасига кўра 4:5 ҳисобида «ПСЖ» клуби фойдасига ҳал бўлди.

Шу тариқа ЕЧЛнинг дастлабки ярим финалчилари аниқ бўлди. Уларнинг ярим финалдаги рақиблари бугун бўлиб ўтадиган «Реал Мадрид» — «Арсенал» ва «Интер» — «Бавария» баҳсидан сўнг маълум бўлади.

Ярим финалда «Барселона» бугун бўлиб ўтадиган «Интер» — «Бавария» учрашуви ғолибига қарши саф тортади. «ПСЖ» эса «Арсенал» — «Реал Мадрид» ўртасидаги баҳс ғолибига қарши финал йўлланмаси учун майдонга тушади.

Қизиғи шундаки, якунига етган дастлабки чорак финал баҳсларининг иккисида ҳам биринчи учрашувда мағлубиятга учраган жамоалар, уй ўйинларида ғалаба қозонишди. Бироқ дастлабки ўйинда ўтказиб юборилган голлар ҳисобига ярим финал йўлланмасидан қуруқ қолишди.

Кўплаб футбол мухлислари ҳамда мутахассислар бугун бўлиб ўтадиган навбатдаги ярим финал йўлланмаси учун курашларни ҳам қизғин ўтишини тахмин қилишмоқда. Сабаби «Реал Мадрид» клуби сафарда «Арсенал»дан жавобсиз учта гол ўтказиб юборган. Қироллик клуби ремонтада амалга оширишлари учун «Арсенал» дарвозасига жавобсиз энг камида учта гол киритишлари талаб этилади.

Бразилия терма жамоаси ҳамда «Реал Мадрид» клуби ҳужумчиси Винисиус Жуниор мазкур жавоб ўйини олдидан ўз фикрларини билдириб ўтди.

«Биз ҳозир атроф-муҳит ҳақида ўйлаяпмиз. Жамоамиз тайёр ва жавоб ўйинини интизорлик билан кутишмоқда. Сизни Бернабеуда кутамиз ва қўлимиздан келганини қилишга ҳаракат қиламиз. Ахир биз Реал Мадридмиз», — дейди ҳужумчи.

«Арсенал» жамоаси мураббийи Микель Артета ҳам «Реал Мадрид»га қарши жавоб ўйини олдидан ўз фикрларини билдирди.

«Камбек бўлиши мумкинлиги ҳақида кўп эшитдим. Биз буни тушунамиз. Камбек Мадрид клуби тарихининг бир қисмига айланиб улгурган. Уларда ҳар хил сценарийлар бўлиши мумкин. Лекин бу борада бизнинг фикримиз бошқачароқ, биз қайси жиҳатларда рақибимиздан устун бўлишимиз мумкинлиги ҳақида ўйладик ҳамда тайёргарлик кўрдик. Ўз сўзимизни майдонда айтганимиз маъқул, энг муҳими ҳам шу», — дейди мутахассис.

Бир нечта йирик нашрлар, «Реал Мадрид» ҳамда «Арсенал» жамоалари ўртасидаги жавоб ўйинида «Сантьяго Бернабеу» трибуналарида ноодатий муҳит намоён бўлиши ҳақида ёзмоқда.

Унда айтилишича, қироллик клуби мухлислари «Арсенал»га қарши ўйин олдидан стадион трибунасида ЕЧЛ кубогини ушлаб турган қирол ва унинг остида «Ман Сити» ҳамда «Атлетико Мадрид» клубларининг рамзий рангларига бурканган юмалоқ тангасимон шакллар акс этган йирик баннер тортишади.

Билдирилишича, ушбу баннердаги тасвирлар Мадрид клуби тарихидаги энг муҳим паллаларда камбек қилиб, кейинги босқич йўлланмасини ҳал қилгани билан боғлиқ. «Ман Сити» ва «Атлетико Мадрид» жамоалари айнан ЕЧЛ доирасидаги илк ўйинларда «Реал Мадрид» устидан ғалабага эришган бўлсаларда, жавоб ўйинида камбек қурбонига айланишган. Мухлислар баннердаги эслатмалар жамоага руҳан куч бағишлашини ҳамда камбек амалга оширишда ёрдам беришига ишонмоқда.

Мазкур баҳс билан боғлиқ бир қанча қизиқарли фактлар ҳам мавжуд. Жумладан, қироллик клуби ҳеч қачон «Арсенал» устидан ғалабага эриша олмаган. Лондон клуби эса биринчи ўйинда 3+ гол фарқи билан ғалаба қозонган ўйинларнинг ҳеч бирида еврокубоклардан чиқиб кетмаган. Бундан ташқари, «Арсенал» кетма-кет 78 ўйиндан буён бир ўйинда иккитадан ортиқ гол ўтказиб юбормаган.

«Реал Мадрид» клуби эса аксинча, ЕЧЛдаги уй-сафар ўйинларининг илк баҳсларида 3+ гол фарқи билан мағлуб бўлгач, ҳеч қачон камбек амалга ошира олмаган ҳамда турнирни тарк этган. Қироллик клубининг бу совуқ анъанаси 61 йилдан буён давом этиб келмоқда. Жумладан, «Реал Мадрид» 1964/65 йилги мавсумда «Бенфика»га қарши 5:1, 1986/87 йилги мавсумда «Бавария»га қарши 4:1, 2012/13 йилги мавсумда эса «Боруссия Д»га қарши 4:1 ҳисобидаги мағлубиятлардан сўнг камбек амалга ошира олмаган.

Европа Чемпионлар лигаси ярим финали йўлланмаси учун курашадиган навбатдаги жуфтлик Италиянинг «Интер» ҳамда Германиянинг «Бавария» клублари бўлиб, ушбу жамоалар ўртасидаги илк ўйин 2:1 ҳисобида «Интер»нинг ғалабаси билан якунланган. Ўз уйида мағлубиятга учраган «Немис машинаси» эндиликда сафарда Италия грандини мағлуб этиши керак бўлади.

«Реал Мадрид» — «Арсенал» ҳамда «Интер» — «Бавария» ўртасидаги баҳсларда фаворит жамоалар камбек қилишлари талаб этилади. Йўқса Европанинг икки гранд клублари турнирни тарк этиши муқаррар. Мазкур учрашувлар, бугун, Тошкент вақти билан 00:00 да параллель равишда старт олади.

Отабек САИДАҲМАДОВ
«Халқ сўзи»