Навоий вилояти Томди туманида ичида 47 нафар йўловчиси бўлган автобус ағдарилиб кетди. Вилоят Ички ишлар бошқармаси ҳодиса юзасидан маълумот берди.

Маълум қилинишича, воқеа бугун, 5 январь куни соат 7:40 ларда Томди тумани «Томдибулоқ» ОФЙ ҳудудидан ўтган А-379 «Навоий-Учқудуқ» халқаро аҳамиятга молик автомобиль йўлининг 167-168 километрлари оралиғида содир бўлган.

Дастлабки суриштирувларга кўра, салонида 47 нафар йўловчиси бўлган «Zhong Tong Bus» русумли автобусни «Зарафшон-Навоий» йўналиши бўйлаб бошқариб бораётган 40 ёшли ҳайдовчи Ш.Х. руль бошқарувини йўқотиб, йўналиши бўйича йўлнинг ўнг томонига чиқиб кетиб ағдарилиб кетган.

Ҳодиса оқибатида йўловчи сифатида кетаётган 2 нафар фуқаро олган тан жароҳатлари билан воқеа жойида вафот этган. Яна 9 киши турли даражадаги тан жароҳатлари билан тиббиёт муассасаларига ётқизилган.

Қайд этилишича, ҳозирда вазиятни тўлиқ ўрганиш, жабрланганлар ва уларнинг оила аъзоларига ёрдам кўрсатиш ҳамда оғир оқибатларга олиб келган шарт-шароитларга ҳуқуқий баҳо бериш мақсадида Навоий вилояти ИИБ томонидан воқеа тафсилотлари ўрганилмоқда.