Фото: Халқ сўзи

Айни масалада вилоят ҳокимлигида Туркиянинг “Outdoor Factory” лойиҳа компанияси менежерлари Ҳакан Бесcелиоғлу ва Ҳусейин Авни Гучлулар қабул қилинди. Тадбир жараёнида видеоалоқа шаклида ширкат дизайнер-меъмори Синан Тураман Янги Наманган шаҳарчаси таркибида барпо этилаётган Янги Ўзбекистон боғи марказида қад ростлайдиган стелла лойиҳаси тақдимотини ўтказди.

Нуфуси яқин йиллар ичида бир миллионга етиши кўзда тутилаётган гуллар шаҳри ҳам эни, ҳам бўйига ўсмоқда. Олий Мажлис Сенати қарори билан яқинда Тўрақўрғон туманидан Давлатобод туманига қўшиб берилган ерлар ҳисобига имкониятлар янада кенгайди. «Янги Наманган шаҳарчаси»да қурилиши режалаштирилган «Янги Ўзбекистон боғи» ҳам шу ерда бунёд этилиб, унинг ҳудуди 68 гектарни ташкил этади. Боғдан ўрин оладиган миллийлик ва замонавийлик, чуқур маъно-мазмунни ўзида мужассам этган Стелла лойиҳаси асосини она заминимизда асос солинган уч ренессанс концепцияси ташкил этади. Мажмуада гул ғунчаси, сув томчиси, стратегиядаги мақсадлар, тарихий барельефлар ўз аксини топади.

Маълумот учун, бўлажак маданият ва истироҳат масканида Наманган рамзи бўлган гуллар боғи, сунъий кўл, фавворалар, 2500 ўринли амфитеатр, автотураргоҳ, савдо шаҳобчалари, болалар боғчаси, шунингдек, кўплаб инфратузилма иншоотлари барпо этилиши кўзда тутилган.

Қудратилла НАЖМИДДИНОВ, «Халқ сўзи».