Foto: Xalq so‘zi

Ayni masalada viloyat hokimligida Turkiyaning “Outdoor Factory” loyiha kompaniyasi menejerlari Hakan Besceliogʻlu va Huseyin Avni Guchlular qabul qilindi. Tadbir jarayonida videoaloqa shaklida shirkat dizayner-meʼmori Sinan Turaman Yangi Namangan shaharchasi tarkibida barpo etilayotgan Yangi Oʻzbekiston bogʻi markazida qad rostlaydigan stella loyihasi taqdimotini oʻtkazdi.

Nufusi yaqin yillar ichida bir millionga yetishi koʻzda tutilayotgan gullar shahri ham eni, ham boʻyiga oʻsmoqda. Oliy Majlis Senati qarori bilan yaqinda Toʻraqoʻrgʻon tumanidan Davlatobod tumaniga qoʻshib berilgan yerlar hisobiga imkoniyatlar yanada kengaydi. “Yangi Namangan shaharchasi”da qurilishi rejalashtirilgan “Yangi Oʻzbekiston bogʻi” ham shu yerda bunyod etilib, uning hududi 68 gektarni tashkil etadi. Bogʻdan oʻrin oladigan milliylik va zamonaviylik, chuqur maʼno-mazmunni oʻzida mujassam etgan Stella loyihasi asosini ona zaminimizda asos solingan uch renessans konsepsiyasi tashkil etadi. Majmuada gul gʻunchasi, suv tomchisi, strategiyadagi maqsadlar, tarixiy barelyeflar oʻz aksini topadi.

Maʼlumot uchun, boʻlajak madaniyat va istirohat maskanida Namangan ramzi boʻlgan gullar bogʻi, sunʼiy koʻl, favvoralar, 2500 oʻrinli amfiteatr, avtoturargoh, savdo shahobchalari, bolalar bogʻchasi, shuningdek, koʻplab infratuzilma inshootlari barpo etilishi koʻzda tutilgan.

Qudratilla NAJMIDDINOV, “Xalq soʻzi”.