Видеодан кадр

«Кўмир таъминот» масъулияти чекланган жамияти Наманган вилоят филиали бошлиғи ўринбосарига нисбатан жиноят иши қўзғатилди. Бу ҳақда Давлат хавфсизлик хизмати хабар берди.

Маълум қилинишича, у ўзининг юқори лавозимларда ишловчи танишлари орқали фуқарони вилоятдаги туманлардан бирининг кўмир омбори раҳбари лавозимига тайинлаш ҳамда омборга келувчи кўмир ортилган юк вагонлари сонини кўпайтириб бериш эвазига 40 минг доллар талаб қилган.

Жорий йилнинг 6 декабрь куни у сўралган пул маблағидан 25 минг долларини филиал ишчиси орқали олиб, фуқарони омбор мудири лавозимига тайинланишини таъминлаган.

Кейинроқ эса мансабдор шахс қолган 15 минг доллар ҳамда омборга кўмир ортилган 30 та вагон юборгани учун улуш сифатида 7,5 минг доллари, жами 22,5 минг доллари беришини талаб қилиб, ўзининг воситачиси бўлган филиал ишчиси орқали ушбу пул маблағини олган вақтида ДХХ ҳамда Иқтисодий жиноятларга қарши курашиш департаменти ходимлари томонидан уларнинг ноқонуний ҳаракатларига чек қўйилган.

Ҳозирда мазкур шахсларга нисбатан Жиноят Кодексининг 168-моддаси 4-қисми «а» банди ва 211-моддаси 3-қисми «а» банди билан жиноят иши қўзғатилиб, «қамоқ» эҳтиёт чораси қўлланилган.

«Кўрилган чора-тадбирлар натижасида аҳолига кўмир маҳсулотларини ўз вақтида ва имтиёзли нархларда етказиб берилиши йўлга қўйилди», дейилади ДХХ хабарида.