Видеодан кадр

Мўйноқ ҳудудидаги яна бир янги излов қудуғида катта босимда табиий газ оқими аниқланди, деб хабар бермоқда «Ўзбекнефтгаз».

Маълум қилинишича, Устюрт минтақасидаги «Мўйноқ» кони яқинида жойлашган Шагирлик-қуйи юра 2-сонли излов қудуғида саноат миқёсида табиий газ оқими аниқланган. Ушбу майдон Тоғ-кон саноати ва геология вазирлиги тасарруфидаги «Ўзбекгеофизика» АЖ ва «Нефть ва газ конлари геологияси ҳамда қидируви институти» ДМ томонидан 3D сейсмик қидирув ишлари маълумотлари асосида чуқур излов бурғилашга тайёрланган.

Жорий йилнинг 10 январь санасида қудуқ туби қуйи юра қатламларида 5265 метр чуқурликкача бурғиланиб, 5265-5061 метр чуқурлик оралиғида табиий газ уюмлари аниқланган.

Қайд этилишича, мазкур қудуқ Жамият ва унинг таркибида фаолият олиб бораётган Лойиҳа бошқарув офисининг малакали мутахассислари томонидан бурғиланган. Лойиҳа бошқарув офисида Президент топшириғига кўра, хориждаги замонавий компанияларда айнан нефть ва газ соҳасида ишлаб, юртимизга олиб келинган малакали ўзбек мутахассисларидан иборат гуруҳ ҳисобланади.

«Қуйи юра қатламларининг геологик тузилишини ўрганиш ҳамда аниқланган газ уюмларининг тарқалиш чегарасини аниқлаш мақсадида ушбу майдонда навбатдаги 3 ва 4 сонли излов-қидирув қудуқларини бурғилаш режалаштирилмоқда», дейилади хабарда.