НАТО Россиядан ҳимояланиш учун 50 тагача бригада яратишни таклиф қилади

НАТО етакчиларидан Россиядан ҳимояланиш учун 50 тагача янги бригадалар тузиш сўралган. Бу ҳақда «Reuters» ўз манбаларига таяниб хабар бермоқда.

Агентликнинг тушунтиришича, НАТО етакчилари альянснинг Вашингтонда бўлиб ўтадиган саммитида блокнинг режалари ҳақида янгиланган маълумотларни олишади.

«Россия ҳужумидан ҳимояланиш бўйича янги режаларни тўлиқ амалга ошириш учун НАТОга 35 дан 50 тагача қўшимча бригада керак бўлади», дейилади агентлик хабарида.

Бундан ташқари, агентлик суҳбатдошининг айтишича, Германия альянснинг янги мудофаа режалари доирасида ҳаво ҳужумидан мудофаа имкониятларини тўрт баробар ошириши керак бўлади.

НАТО расмийсининг агентликка айтишича, ҳарбий стратеглар «иттифоқни ҳимоя қилиш учун зарур бўлган қўшинлар ва қуролларга бўлган батафсил талабларни» аниқлаган.

«Ҳаво ва ракетага қарши мудофаа, узоқ масофага учувчи қуроллар, логистика ва қўшинларни ташишга қодир йирик қуруқликдаги кучлар бизнинг устувор вазифаларимиздандир», дея қўшимча қилди альянс вакили.

Унинг қўшимча қилишича, НАТО аъзолари учун мудофаа салоҳиятини ошириш мақсадларини белгилаши мумкин.

Россия президенти Владимир Путин америкалик журналист Такер Карлсонга берган интервьюсида аввалроқ Москва НАТО мамлакатларига ҳужум қилмоқчи эмаслигини, бу мантиққа тўғри келмаслигини батафсил тушунтирган эди. Россия раҳбарининг таъкидлашича, Ғарб сиёсатчилари эътиборни ички муаммолардан чалғитиш учун ўз аҳолисини хаёлий Россия таҳдиди билан мунтазам равишда қўрқитишади, бироқ «ақлли одамлар бу сохта эканлигини жуда яхши тушунишади».

«Украинадаги уруш Россия, Хитой, Шимолий Корея ва Эроннинг қанчалик яқин эканини кўрсатмоқда. Хитой Россиянинг Украинага қарши урушида муҳим қўшниси ҳисобланади. Путин ва Си Жинпин НАТО ва АҚШ Украинада ютқазишини истайди. Ва агар Путин Украинада ғалаба қозонса, бу нафақат уни, балки Си Жинпинни ҳам илҳомлантиради. Япония бош вазири айтганидек, бугун Украинада содир бўлаётган воқеа эртага Осиёда ҳам бўлиши мумкин», — дея айтиб ўтди Йенс Столтенберг.

Францияда сайлов

Францияда 7 июль куни иккинчи тур парламент сайловларидан кейин «Янги халқ фронти» сўл кучлар альянси ғалаба қозонди. Сайлов натижаларига кўра, бош вазир Габриэль Аттал истеъфога чиқади.

«Биргаликда» президентлик коалицияси иккинчи, биринчи турда ғалаба қозонган Марин Ле Пеннинг «Миллий бирлик» партияси эса учинчи ўринни эгаллади.

Франция президенти Эмманюел Макрон партияси Европарламентга сайловларда имкониятни бой берганидан кейин унинг қарори билан муддатидан олдин парламент сайловлари ўтказилиши эълон қилинган эди.

«Янги халқ фронти» коалицияси етакчиси Жан Люк Меланшон сайлов натижаларидан сўнг Фаластин давлатчилигини тан олиш зарурияти ҳақида гапирган. Шунингдек, у Франция ирқчилик, исломофобия, антисемитизм ва ҳар қандай динга нисбатан нафрат пардасини ёпиши кераклигини қўшимча қилган.

Венгрия Бош вазири Виктор Орбан Пекинда Хитой раҳбари Си Сзинпин билан учрашди.

Орбан ўз ташрифини «Тинчлик миссияси 3.0» деб таърифлаб, Хитойнинг Россия ва Украина ўртасида тинчликни ўрнатишдаги потенциал ролини таъкидлади.

Европалик сиёсатчининг таъкидлашича, Пекиннинг таъсири тинчлик йўлида шароит яратиш учун ҳал қилувчи аҳамиятга эга.

Учрашувда ХХР раиси Европа Иттифоқи кучларини Россия ва Украина ўртасида тўғридан-тўғри тинчлик музокараларини қайта тиклашни қўллаб-қувватлашга чақирди.

Хитой давлат телерадиокомпанияси CCТВ маълумотларига кўра, Си Сзинпин халқаро ҳамжамият икки томон ўртасидаги мулоқот ва музокараларга ёрдам бериши кераклигини айтган. У йирик давлатлар ўт очишни тўхтатишга эришишга ижобий ҳисса қўшиши зарурлигини таъкидлади.

Хитой, айниқса, Украинадаги можаро бошланганидан бери Россия билан стратегик ҳамкорликни сақлаб келмоқда. Чин диёри ўзини нейтрал, деб кўрсатишига қарамай, савдо ҳажмини ошириш орқали Россия иқтисодиётини қўллаб-қувватлади. Халқаро изоляцияга дуч келган Россия учун бу ҳамкорлик жуда муҳим эди. Шу сабабли ҳам Европа Иттифоқи Пекиннинг Москвага сўзи ўтишига ишонишмоқда.

Орбаннинг Пекинга ташрифи унинг ўтган ҳафта Россия ва Украинага қилган кутилмаган саёҳатларидан кейин содир бўлди. Россияда у президент Владимир Путин билан учрашиб, давом этаётган можарони муҳокама қилган. Унинг хатти-ҳаракатлари Киев ва Европа Иттифоқи томонидан танқидга учради. Орбаннинг позицияси Европа Иттифоқининг уруш бўйича позициясига путур етказиши мумкинлигидан хавотирда.

Венгрия июль ойи бошидан Европа Иттифоқига раислик қилишни бошлаган.

Моди Москвада

Ҳиндистон бош вазири Нарендра Моди икки кунлик расмий ташриф билан Москвага ташриф буюрди.

Бош вазир жўнаб кетишидан олдин Россия президенти Владимир Путин билан учрашишни интиқлик билан кутаётганини айтиб, уни дўст деб атаган.

У Ҳиндистон ва Россия Федерацияси ўртасидаги алоҳида имтиёзли стратегик шериклик сўнгги 10 йил ичида, жумладан, энергетика, хавфсизлик, савдо, сармоя, соғлиқни сақлаш, таълим, маданият, туризм ва одамлар ўртасидаги алмашув соҳаларида ривожланиб бораётганини таъкидлади.