14-январь — Ватан ҳимоячилари куни муносабати билан Сурхондарё вилояти божхона бошқармасида «Ватанпарварлик ойлиги» доирасида «Очиқ эшиклар куни» тадбири бўлиб ўтди. Унда бошқармага бириктирилган 18-сонли умумтаълим мактаби ўқувчилари, божхона ходимлари, тизим фахрийлари ҳамда Божхона институти курсантлари иштирок этди.

Тадбирда уч авлод учрашуви ташкил этилиб, фахрийлар Янги Ўзбекистон божхона тизимида амалга оширилаётган ислоҳотлар, хизмат шароитлари ва яратилаётган имкониятлар ҳақида сўз юритдилар. Ўқувчиларга Божхона институтида таълим олиш шартлари, курсантликка қабул тартиби бўйича маълумотлар берилди.

Шунингдек, хизмат қурол-аслаҳалари намойиш қилиниб, ўқувчилар улар ҳақида амалий ва назарий билимларга эга бўлдилар. Ёшлар ўзларини қизиқтирган саволларига мутахассислардан атрофлича жавоб олишди.

— Тадбир жуда қизиқарли ўтди— дейди 18-сонли мактаб ўқувчиси Дилшод Норбоев. — Божхона соҳаси ҳақида кўп янгиликларни билдим. Келажакда Ватанга шу соҳа орқали хизмат қилиш истагим пайдо бўлди.

Тадбир доирасида китоб ярмаркаси ҳам ташкил этилди. Шубҳасиз, бу ташаббус ёшларда китобга бўлган қизиқишни оширишга хизмат қилди.

Фарҳод ЭСОНОВ, “Халқ сўзи”.