Иллюстратив фото

Аҳоли хонадонлари ва ижтимоий соҳани табиий газ билан узлуксиз таъминлаш мақсадида метан «заправка»лар фаолиятига вақтинча чеклов киритилади. Бу ҳақда Энергетика вазирлиги ахборот хизмати хабар берди.

Маълум қилинишича, қўшни давлатдаги газ тармоғида кузатилган техник носозлик туфайли импорт қилинаётган табиий газ қисқаргани сабабли зарурий чоралар кўрилмоқда.

Хусусан, аҳоли хонадонлари ва ижтимоий соҳа объектларида табиий газ босими пасайишини олдини олиш мақсадида маҳаллий ҳокимликлар билан келишилган режа-графикларга асосан метан «заправка»лар фаолиятига вақтинча чеклов киритилмоқда.

Таъкидланишича, биринчи навбатда аҳоли хонадонлари ва ижтимоий соҳа объектларини (мактаб, мактабгача таълим ташкилотлари, шифохоналар, олий таълим муассасалари, иссиқлик электр станциялари ва бошқалар) табиий газ билан барқарор таъминлаш бош вазифаларимиздан бири ҳисобланади. Юқоридаги амалий ҳаракатлар ҳам айнан шу мақсадда жорий этилмоқда.

«Бу зарурий чоралар вақтинча бўлиб, газ босимини меъёрга келтириш бўйича амалий ишлар олиб борилаётганини маълум қиламиз», дейилади вазирлик хабарида.

Қўшимча қилинишича, ҳолат ҳақида қўшимча ахборот берилади.