АҚШ президенти Дональд Трампнинг Россия президенти Владимир Путин билан шу ҳафтанинг ўзидаёқ музокара ўтказиши мумкин. Бу ҳақида «The Kyiv Independent» нашри маълумот берди.

Унда айтилишича, Украина вақтинчалик 30 кунлик ўт очишни тўхтатиш келишувига тайёрлигини билдирганидан сўнг, Трамп Россия билан ҳамкорлик қилиш зарурлигини таъкидлаб, Путин билан музокарани шу ҳафтадаёқ ўтказишни режа қилган.

Россия расмийлари ҳам Трамп ҳамда Путин ўртасида тез кунда бўлиб ўтиши мумкин бўлган музокаралар ҳақидаги маълумотларни инкор этмади.

«Россия вакиллари яқин бир неча кун ичида АҚШ расмийлари билан музокарага киришиши мумкин. Бу хабарни истисно қилмаймиз», — дейди Россия Ташқи ишлар вазирлиги матбуот котиби Мария Захарова.

Қўшма Штатлар раҳбари Москва билан бўлиб ўтадиган музокаралардан умиди катта эканлигини яшириб ўтирмаган.

«Россия ҳамда Украина можаросининг якун топиши дунё ҳамжамияти учун жуда муҳим. Мен Путин билан бугун ёки эртага гаплашаман. Умид қиламанки Путин ҳам ўт очишни тўхтатишга рози бўлади. Менинг назаримда бу масала 75 фоиз ҳал бўлган», — деган Америка раҳбари.