Мексикадаги «Халиско янги авлоди» картели раҳбари Немесио Осегера Сервантеснинг йўқ қилиниши ортидан мамлакат бўйлаб тартибсизликлар авж олди.

Маълумки, «Эль Менчо» лақаби билан танилган қудратли наркобарон Жалиско штатидаги Тапалпа ҳудудида ўтказилган операция чоғида яраланган ва Мехико шаҳрига олиб кетилаётганда вафот этганди. Ушбу картель АҚШга катта миқдорда фентанил ва бошқа гиёҳванд моддалар етказиб бериши билан танилган.

Эътиборга молик жиҳати шундаки, 2026 йилги футбол бўйича Жаҳон чемпионатининг очилиш ўйини айнан Мексикада ўтказилиши ва унда мезбонлар жанубий Африка терма жамоасига қарши саф тортишлари керак. Шунингдек, мундиал доирасида яна бир қанча ўйинлар айнан Мексиканинг учта шаҳрида, жумладан, пойтахтдан ташқари Монтеррей ва Гвадалахарада ҳам баҳслар ўтказилиши режалаштирилган.

Гвадалахара шаҳрида Жаҳон чемпионати доирасида тўртта ўйин ўтказилиши белгиланган. Булар, шу йилнинг 26 июнь санасида бўлиши кутилаётган Уругвай ҳамда Испания ўртасидаги марказий ўйин, шунингдек, 18 июнь куни ўтказиладиган Мексика ва Жанубий Корея ўртасидаги баҳс ҳам айнан ушбу шаҳарда ўтказилади.

Таҳлилчиларнинг фикрича, мамлакатнинг баъзи ҳудудларида содир бўлаётган ҳозирги ҳолат, шунчаки безорилик эмас, аксинча фуқаролар урушига ўхшаб кетади. Бу эса атиги 108 кундан кейин старт олиши кутилаётган футбол бўйича Жаҳон чемпионати баҳсларининг хавфсиз ўтказилишини сўроқ остида қолдирмоқда.

Сўнгги маълумотларга кўра, биргина Гвадалахара шаҳри аэропортида одамлар жон сақлаш учун хавфсиз ҳудуд излашмоқда. Интернетда тарқалган видеотасвирлардан кўриш мумкинки, оналар ўз фарзандларини қучоқлаганча хавотирда қолмоқда. Аэропорт ўз юкларини олиб югураётган маҳаллий аҳоли вакиллари ва сайёҳлар билан гавжум. Яна бир видеотасвирда туристлар учун машҳур дам олиш маскани ҳисобланадиган Пуэрто Валларта шаҳри осмонини тутун қоплагани акс этган.

Бундан ташқари, шаҳардаги дўконлар ўз фаолияти тўхтатган, мактаблар эса ёпилмоқда. Айрим аэропортларда авиачипталарнинг бекор қилиниш ҳолатлари ҳам кузатилган.

Дунё бўйлаб қатор мамлакатлар, хусусан, АҚШ ўз фуқароларини огоҳликка чақириб, хавфсиз бошпана топиш ҳамда у ердан чиқмасликни тавсия қилган. Германия ташқи ишлар вазирлиги ҳам ўз фуқароларини хавфсизлик қоидаларига амал қилиш ва Мексиканинг бошқа штатларига саёҳат қилишни тўхтатишга чақирган.

Мексикадаги ушбу тартибсизликлар глобал эътиборни жалб қилмоқда. Турли йирик нашрлар бир неча ой ичида бошланиши кутилаётган футбол бўйича Жаҳон чемпионатини ўтказиш мумкинми, деган саволни ўртага ташламоқда. Айни вақтда Мексикадаги мазкур тартибсизликларга қарамай мундиал учун расмий тайёргарлик ишлари давом этмоқда.