Франциялик ҳужумчи Килиан Мбаппе «Эл-Класико»да «Барселона» дарвозасига киритган хет-триги билан «Реал Мадрид» тарихига кирди. У жорий мавсумда «Реал» сафида дебют қилган футболчилар орасида энг кўп гол урган ўйинчига айланди — 53 ўйинда 39 та гол. Бу натижа билан у 32 йил аввал ўрнатилган Иван Заморанонинг 37 голлик рекордини янгилади.

Каталонларга қарши бўлиб ўтган ўйинда Мбаппе «Реал»нинг ягона тўпурарига айланди. У аввал пеналтидан гол урди, сўнгра рақибнинг юқори чизиғидан фойдаланиб, иккита ажойиб гол билан хет-трикни расмийлаштирди. Гарчи бу хет-трик жамоага ғалаба олиб келмаган бўлса-да, Мбаппе клуб тарихида ўчмас из қолдирди.

Мбаппе ўз дебют мавсумида нафақат Заморано, балки «Реал» тарихидаги энг буюк тўпурарлардан бири — Криштиану Роналдуни ҳам ортда қолдирди. Роналду 2009–10 йилги дебют мавсумида 33 та гол урган эди. Рууд ван Нистелроой (2006–07) ҳам шунча гол билан дебют қилган. Яна бир афсона — Роналдо Назарио 30 та гол билан дебют мавсумини якунлаган эди.

Мбаппе ҳозирда Ла Лиганинг «Пичичи» (тўпурарлар) пойгасида ҳам етакчилик қилмоқда. У 27 та лига голи билан «Барселона» ҳужумчиси Роберт Левандовскидан 2 та гол олдинда бормоқда. Ла Лига чемпионлиги қўлдан кетган тақдирда ҳам, бу ютуқ Мбаппе учун катта шахсий мукофот бўлади.

Франциялик футболчи бу мавсумда барча мусобақаларда гол уришга улгурган. У Европа Чемпионлар Лигаси (7 та гол), УЕФА Суперкубоги, ФИФА Қитъалараро кубоги, Испания Суперкубоги ва Испания Кубогида ҳам гол муаллифи бўлган. Фақат Карим Бензема билан бирга Мбаппе «Реал» сафида бир мавсумда олтита мусобақада гол урган футболчилар сафидан жой олди.

Мбаппе «Реал»даги илк мавсумиданоқ тарихий ютуқларга эришмоқда. Агар у клубдаги фаолиятини шундай давом эттирса, яқин йилларда яна кўплаб рекордлар янгиланиши тайин.