Фото: Reuters

Россия президенти Владимир Путин ва АҚШ президенти Дональд Трампнинг 15 августга белгиланган учрашуви Аляска штатининг энг йирик шаҳри — Анкориждаги АҚШ Ҳарбий-ҳаво ва қуруқлик кучларининг Элмендорф-Ричардсон қўшма ҳарбий базасида бўлиб ўтади. Бу ҳақда CNN телеканал Оқ уйдаги манбаларига таяниб хабар берди.

“Тез орада ташкилотчилар катта штатдаги саммитни ўтказиш учун мос бўлган ягона шаҳар Анкориж бўлади деган хулосага келишди. Фақатгина шаҳарнинг шимолий чеккасида жойлашган Элмендорф-Ричардсон қўшма базаси тарихий учрашув учун хавфсизлик талабларига жавоб бера олади”, — дейилади телеканали хабарида.

Ҳозирча Москва ва Вашингтон бу маълумотни ҳали расман тасдиқлагани йўқ.

Телеканалнинг қайд этишича, Трамп маъмурияти Путин ва унинг жамоаси Америка ҳарбий объекти ҳудудида бўлишдан қочмоқчи.

Икки етакчи ўртасидаги музокаралар ўтказиладиган жой сифатида Аляска узоқ парда ортидаги музокаралардан сўнг танланган. Шу билан бирга, Америка расмийлари “Россия президенти АҚШ тупроғида — бир вақтлар Россия империясининг бир қисми бўлган қуруқликда учрашишга рози бўлганидан хурсанд бўлишди ва бироз ҳайратда қолишди”, — дейилади хабарда.

Путин қандай ҳимоя қилинади
АҚШ махфий хизматининг собиқ юқори мартабали зобити Роберт Макдоналд Элмендорф-Ричардсон ҳарбий базасини Путин ва Трамп ўртасидаги юзма-юз музокаралар учун “мантиқий танлов” деб атади. Уларнинг учрашуви биринчи навбатда “маросимларга эмас, натижаларга” қаратилган, деб ҳисоблайди у.

“У ерга авиалайнерлар қўниши мумкин. Ҳар икки давлат олиб ўтадиган етакчилар учун лимузинларни ҳам у ерга ўтказиш мумкин. Гап яхши ҳимояланган объект ҳақида кетмоқда”, — дейди Макдоналд.

Унинг таъкидлашича, Россия етакчисининг Аляскадаги хавфсизлиги нафақат унинг шахсий хавфсизлик хизмати, балки АҚШ Махфий хизмати томонидан ҳам таъминланади. Макдоналд сиёсий тафовутлар давлат раҳбарларининг ташрифлари чоғида хавфсизлик протоколига таъсир қилмаслигига ишонтирди.

“Биз президент Путин бу ерда бўлганида унга ҳеч нарса бўлишини истамаймиз”, — дея таъкидлади Макдоналд.

“The New York Times” газетасининг ёзишича, АҚШ махфий хизмати аллақачон Анкорижда олти хонали уйни ижарага олган.

Аляскадаги рус маданият маркази директори Анна Вернаянинг ТАСС агентлигига айтишича, шаҳарга аллақачон юқори мартабали меҳмонлар билан рейслар келаяпти. Хусусан, АҚШ соғлиқни сақлаш ва инсон хизматлари котиби Роберт Кеннеди ва россиялик дипломатлар етиб келди. Верная шу ўринда Анкориждаги меҳмонхоналар тўла эканлигига эътибор қаратди.

Мулоқот учун мумкин бўлган жойлар
Маҳаллий ОАВ Путин ва Трамп учрашиши мумкин бўлган турли жойларни, жумладан Гирдвуд курорт шаҳридаги “Alyeska Resort” меҳмонхонасини ҳам тилга олган. Шу ўринда журналистлар 12-16 август кунлари меҳмонхонада хоналарни бронь қилиш мумкин эмаслигига эътибор қаратди.

Бундан ташқари, етакчилар саммитни 2015 йилда АҚШнинг собиқ президенти Барак Обама тўхтаган “Капитан Кук” меҳмонхонасида ўтказиши мумкинлиги ҳақида ҳам таклифлар бўлган. 2017 йилда Хитой раҳбари Си Цзиньпин Алясканинг собиқ губернатори Билль Уокер билан шу ерда учрашган эди.

Кейинчалик CNN эътиборини бўлажак саммит учун жой топиш ва тасдиқлашга уринаётган АҚШ расмийлари “жиддий тўсиқ”қа дуч келганига эътибор қаратди.

“Ёз Аляскадаги энг юқори сайёҳлик мавсумидир ва икки дунё етакчисини қабул қилиш учун мавжуд ва жиҳозланган вариантлар жуда чекланган эди”, — дейилади канал хабарида.

Якунда Алясканинг собиқ лейтенант губернатори Лорен Леманнинг АҚШ президентлари ҳарбий базада учрашиши ҳақидаги тахмини ҳақиқатга яқин бўлиб чиқди.

“Бундай ҳолатларда сиз хавфсизлик ҳақида ўйлашингиз керак, бундан ташқари, яқин атрофда аэропортлар бўлиши керак, чунки кўп одамлар келади. Бу борада иккита жой ёдга тушади. Улардан бири Анкориж яқинидаги Элмендорф-Ричардсон ҳарбий базаси. У ерда учрашув ўтказиш учун кўплаб имкониятлар мавжуд”, — деган эди у бир кун олдин «РИА Новости» билан суҳбатда.

Шунингдек, Леман Фейрбанкс яқинидаги Эиелсон ҳарбий базасини ҳам саммит учун яхши жой сифатида кўрсатган.