«Манчестер Сити» жамоаси ёзги трансфер ойнаси арафасида жамоани янгилаш режалари доирасида швейцариялик ҳимоячи Мануэль Аканжини «Реал Мадрид»га таклиф қилди. Бу ҳақда «90min» нашри хабар бермоқда. Гарчи Аканжининг «шаҳарликлар» билан тузган амалдаги шартномаси 2027 йилгача мўлжалланган бўлса-да, клуб уни трансферга қўйишга тайёр эканини билдирган.

Манбага кўра, «Сити» вакиллари Мадрид клуби билан боғланиб, футболчини расмий тарзда таклиф қилган. Бироқ «Реал Мадрид» ушбу трансферга катта қизиқиш билдиргани йўқ. 30 ёшга яқинлашаётган Аканжи клубнинг узоқ муддатли режаларига мос келмаяпти. Мадридликлар айни пайтда ёш ва истиқболли футболчиларга устуворлик беришни мақсад қилган.

Бундан ташқари, Аканжининг тез-тез жароҳат олиши унинг трансферига нисбатан шубҳаларни кучайтирган. Бу эса «Реал» раҳбариятининг эҳтиёткор қарорига олиб келган. Шу билан бирга, Пеп Гвардиола ёзги трансфер ойнасида жамоанинг бир неча тажрибали футболчилари билан хайрлашишини очиқ эълон қилган.

«Манчестер Сити» таркибни янгилаш жараёнини аллақачон бошлаган. Қишки трансфер даврида клуб марказий ҳимоячилар Абдуқодир Ҳусанов ва Витор Рейсни катта маблағ эвазига харид қилган. Бундан ташқари, ярим ҳимоячи Нико Гонсалеш ва ҳужумчи Омар Мармуш ҳам жамоага қўшилди.

Клуб ҳозирда Кевин Де Брюйне, Эдерсон, Жек Грилиш, Матео Ковачич, Натан Аке ва Мануэль Аканжи каби футболчиларга янги жамоа топишга ҳаракат қилмоқда. Бу эса ёзда «Этиҳад»да катта ўзгаришлар бўлишидан дарак бермоқда.

Жорий мавсумда «Манчестер Сити» кутилган натижаларга эриша олмаяпти. Клуб Англия Премер-лигаси турнир жадвалида бешинчи ўринда бормоқда ва пешқадам «Ливерпул»дан 22 очкога ортда қолмоқда. Шунингдек, Чемпионлар лигаси плей-офф босқичида ҳам айнан «Реал Мадрид»га мағлуб бўлиб, мусобақани тарк этди.