Иллюстратив фото

Қозоғистоннинг супермаркетлар тармоғи бўлган «Magnum» Ўзбекистон бозорини тарк этмоқда. Бу ҳақда «Forbes Kazakhstan» хабар қилди.

Тармоқнинг Тошкентда бешта супермаркети ва битта гипермаркети бор эди. Маълумотларга кўра, уларнинг айримлари аллақачон ёпилган, қолганларида ҳам охирги товарлар сотиб тугатиляпти.

«Magnum» 2021 йил декабрь ойида Тошкентда иккита гипермаркет очиш орқали Ўзбекистон бозорига кириб келган. 2023 йил августида компания Ўзбекистондаги «Carrefour» тармоғининг дўконларини бошқарган «Majid Al Futtaim LLC Uzbekistan» бизнесини сотиб олиб, дўконлари сонини еттитагача оширган.

Компания вакиллари 2024 йилда яна 10 та савдо нуқтасини очиб, тармоқлар сонини 17 тага етказишини маълум қилган, бироқ ушбу кенгайиш режалари тўхтаган. Сўнгра, 2024 йил февраль ойида Тошкентдаги «Magnum Qoratosh» савдо нуқтаси, май ойида эса яна икки савдо нуқтаси ёпилган.

«EastFruit» таҳлилчиларининг фикрича, «Magnum» ўз вақтида «Carrefour» тармоғи томонидан йўл қўйилган хатолардан тўлиқ хулоса чиқармаган. Бу омил ушбу савдо объектларини самарали чакана бизнес бирликларига айлантиришда муаммолар юзага келтирган.