«Миллий тикланиш» партияси раҳбари Алишер Қодиров аёлларни паспортга рўмолини ечиб тушишга мажбурлашни тўхтатиш кераклигини айтди. Бу ҳақда депутат Тошкентда бўлиб ўтган Женнифер Лопез концертидан сўнг Telegram'даги каналида ёзиб қолдирди.

Сиёсатчи «Миллий тикланиш» партияси ҳар қандай тараққиётни қадриятларга таяниши керак деган ғоясида мустаҳкамлигини эслатиб ўтган.

«Женифер Лопесни концерти сердаромад иш ва ёпиқ тадбир, наркотик тарқатиб, давлатга қарши тарғибот қилмаса, ўтказади, танасини кўрсатиш уни танлови, кўриш эса тадбирга билет олганларники, дунёвийлик шу! Лекин, худди шундай ўраниб юрмоқчи бўлган аёл ватандошни ҳам танлови қонун билан ҳимоя қилинган», деб ёзган Алишер Қодиров.

Депутат, шунингдек, «яланғоч намойишини дунёвийлик деб қабул қилдик, энди ёпиниб юриш ҳуқуқига ҳам дахл қилмаслик кераклигини қабул қилайлик», деган фикрни илгари сурган.

«Лопезга қандай кийинишни ўргатмаганимиздек, эътиқодли аёлларимизга рўмолни қандай ўрашни ўргатишни, қолаверса, шу ёшга келиб эътиқоди талабига риоя қилган аёлларни паспортга рўмолини ечиб тушишга мажбурлашни ҳам тўхтатиш керак. Идентификация талаблари юзни очиқ бўлишини тақозо қилади, сочни эмас. Лопезга кўрсатган бағрикенглигимизни диндор аёлларимизга ҳам кўрсатайлик», деган «Миллий тикланиш» партияси раҳбари.

Унинг қўшимча қилишича, дунёвийлик ишонганга ҳам, ишонмаганга ҳам тенг бўлаолиш дегани, зўрни заифга ҳаётдан дарс бериши эмас.

Депутатнинг қайд этишича, Ўзбекистоннинг дунёвий давлат эканлиги тортишилмайди. Дунёвий давлат кўпчилик сайлаган парламент томонидан қабул қилиниб, кўпчилик сайлаган президент томонидан маъқулланган қонунларни бузмаган ҳолда, ўзи истаганидек яшаш имконини беради.

«Агар бирон ватандош пиво ичмоқчи бўлса, ичади, бу унинг танлови, ичмайдиган ватандош ичмайди ва бунинг сабабини ҳар икки тоифа ҳеч кимга изоҳ беришга мажбур эмас. Алкоголни ичиш мумкин, лекин реклама қилиш мумкинмас, бу амалдаги қонунда белгиланган, албатта, парламент сайловларини мутлақо ютадиган бирон сиёсий куч қонунни ўзгартириб алкоголни «миллий қадрият», бир жинслиларни оила қуриш талабини эса эркин танлов сифатида норма қилиши ҳам мумкин, бунга сиз ҳуқуқ берасиз…», дейди у.

Қодиров Ўзбекистонда барча миллат ва дунёқарашдаги ватандошлар эмин-эркин, қонунларни бузмаган ҳолда фаровонликка интилиши учун шароит яратиш устувор мақсад эканлиги мустаҳкам белгиланганини, ҳамма тенг ва ҳеч ким камситилмаслиги кафолатланганини қайд этди.