Кеча, 9 апрель куни Португалия терма жамоаси ҳамда «Ал-Наср» жамоаси ҳужумчиси Криштиану Роналдунинг футбол оламида кашф қилинишига сабаб бўлган мураббий ва скаут Аурелио Перейра 77 ёшида оламдан ўтди. Бу ҳақда «SNN Sport» нашри хабар берди.

Маълум бўлишича, Аурелио узоқ вақт давомида оғир хасталик билан курашиб келган. У бир қанча юлдузли футболчиларни оммага танилишида улкан ҳисса қўшган. Криштиану Роналду, Луиш Нани, Луиш Фигу, Рикарду Куарежма ҳамда Паулу Футре каби юлдуз футболчилар шулар жумласидандир.

Криштиану Роналду мураббийнинг вафоти муносабати билан унинг оила аъзоларига ҳамдардлик билдирди.

«Футбол оламининг буюк тимсолларидан бири бизни тарк этди, аммо унинг мероси абадий яшайди. У мен ва яна кўплаб футболчилар учун қилган барча эзгу ишларига доимо миннатдор бўлиб яшайман. Барчаси учун раҳмат, жаноб Аурелио», — деб ёзган Роналду ўзининг ижтимоий тармоқдаги саҳифасида.

Маълумот учун, Аурелио Перейра Криштиану Роналдунинг иқтидорини 12 ёшлигида, «Nacional» клубида тўп тепиб юрган пайтлардаёқ пайқаган ҳамда «Спортинг» клубига жалб қилган.

Шунингдек, Португалия терма жамоаси «Эвро-2016» турнирида ғолиб бўлгач, кўплаб мутахассислар терма жамоага «Аурелиос» номини беришни таклиф қилган. Сабаби турнир ғолиби бўлган Португалия терма жамоаси сафидаги 10 нафар футболчини айнан Аурелио Перейра кашф этганди.

Перейра фаолиятининг катта қисмини «Спортинг» клубида ўтказган. Дастлаб футболчи, кейин эса мураббий сифатида ишлаган. 1988 йилда «Клубга футболчилар жалб қилиш ҳамда ўқитиш» бўлимини ташкил қилган.

Португалиянинг «Спортинг» клуби 2012 йилда асосий стадионини ушбу мутахассис шарафига «Перейра» деб номлаган. У 2018 йилда УEФА томонидан «Португалия ва Европа футболи ривожига қўшган беқиёс ҳиссаси учун» ордени билан тақдирланган.

Португалия футбол федерацияси президенти Педру Проэнса мутахассиснинг вафотини «Португалия футболи учун топиб бўлмайдиган йўқотиш» деб атади.

«Тарихимиздаги энг яхши ўйинчиларни кашф этган одам энди орамизда йўқ. У томонидан қолдирилган улкан меросни ҳимоя қилиш учун ҳамма нарса қиламиз. Перейра доимо меҳрибон, яхши хулқли ва ҳар доим бизнинг қадриятларимизни ҳимоя қилган инсон сифатида қалбимизда қолади», — дейди Педру Проэнса ҳамдардлик нутқида.