Кеча, 28 август куни Европа Чемпионлар лигаси мусобақасининг гуруҳ босқичига қуръа ташланди. УЕФА 2 йилдан бери мусобақаларни футболга нотаниш бўлган форматда ўтказиб келмоқда. Бу мухлисларга ёқиб тушаётган бўлса-да, баъзи жамоаларнинг зарарига ишламоқда.

Бугун УЕФА Чемпионлар лигаси қуръасини энг муваффақиятли ўтказган 3 та ва омадсизликка учраган 3 та клубни таҳлил қиламиз.

Қуръада омади чопган клублар

«Арсенал»

Микел Артета жамоаси учун бу галги қуръа анча яхши ўтди дейишга асослар етарли. 2-саватчадан ўрин олган «тўпчилар» гуруҳ босқичида 1-саватчадан «Бавария» ва «Интер» рақиб сифатида танланди. Албатта, 1-саватчадан Европанинг энг тўп жамоалари ўрин олган. Аммо, ҳозирги «Интер»дан бемалол очко олиш мумкин.

Иккинчи саватчадан жамоага Испаниянинг «Атлетико Мадрид» ва Бельгиянинг «Брюгге» жамоалари тушди. Мадрид клуби билан жамоанинг имкониятлари тенг. Аммо, «Брюгге»ни бемалол мағлуб этиш мумкин. Устига-устак ушбу баҳс Лондонда ўтади.

Учинчи ва тўртинчи саватчадан «Арсенал»га бирорта жиддий рақиб тушмади. Грециянинг «Олимпиакос», Испаниянинг «Атлетик Бильбао», Қозоғистоннинг «Қайрат» ва Чехиянинг «Славия Прага» жамоалари. Қисқа қилиб айтганда, Артета шогирдлари бундай тақвим билан дастлабки саккизталикка кира олмасликлари уятли ҳолат бўлади.

«Копенгаген»

Даниянинг «Копенгаген» жамоаси ҳам қуръа натижаларидан хурсанд бўлган бўлса керак.

Дастлабки саватчадан жамоага «Барселона» ва кўпчилик томонидан биринчи саватчадаги энг кучсиз жамоа деб қаралган «Боруссия Дортмунд» тушди. Немисларга қарши баҳс Данияда ўтишини инобатга олсак, «Копенгаген»да «Боруссия»дан очко олиш имконияти бор.

Иккинчи саватчадан «Байер» ва «Вильярреал» рақиб сифатида танланди. Ҳар икки жамоани ўртача баҳолаш мумкин.

Лекин учинчи саватча данияликлар учун омадсиз бўлди. Ушбу тўққизталикдан Луис Мендилибaр шогирдларига «Наполи» ва «Тоттенҳэм» рақиб бўлишади.

Сўнгги саватчадан эса «Қайрат» ва «Қарабоғ» жамоалари тушди. Мағлуб этса бўладиган рақиблар.

Хуллас, қуръа натижасидан сўнг «Копенгаген»да кейинги босқичга умид пайдо бўлиши керак.

«Пафос»

Мусобақада иштирок этадиган энг кучсиз 5 та клубдан бири деб қаралаётган Кипр мамлакатининг «Пафос» клуби қуръанинг энг омадли жамоаси бўлди, дейиш мумкин.

Жамоа мусобақада «Монако», «Славия Прага», «Қайрат», «Олимпиакос» каби ўзига яқин кўрилаётган жамоаларга қарши ўйнайди. Шу ўйинларнинг ўзида натижа қилинса, кейинги босқичга чиқиш учун яхши имконият юзага келади.

Шунингдек, жамоа 2-саватчадаги «Вильярреал» клубини ўз майдонида қабул қилади. Бу баҳсда ҳам ижобий натижа учун ҳаракат қилиш мумкин.

Тўғри, «Бавария», «Челси» ёки «Ювентус» кучли рақибдир. Лекин юқорида айтиб ўтилган ўйинларда қўлга киритиладиган ижобий натижаларнинг ўзи Кипр клубига гуруҳдан чиқиш имкониятини тақдим этиши мумкин.

Қуръада омадсизликка учраган клублар

«Union SG»

Бельгиянинг «Union SG» жамоасини қуръада омади юришмаганлар қаторига қўйишга ҳақлимиз, менимча.

Тўртинчи саватчадан баҳсларга қўшилган ушбу клубга бирорта ўзи савиясидаги рақиб тушмади.

1-саватчадан «Барселона» ва «Интер», 2-саватчадан «Аталанта» ва «Атлетико Мадрид» каби жамоалар Бельгия клубига рақиб сифатида танланди.

Клубнинг учинчи саватчадаги рақиблари ҳам анойи эмас – Франциянинг «Марсель» ва Нидерландиянинг «ПСВ» жамоалари. Барчага «бахт улашган» тўртинчи саватчадан ҳам «Union»га ўз даражасидаги рақиб тушмади. Туркия чемпиони «Галатасарой» ва Англиянинг «Ньюкасл» клублари.

Хулоса қилиб айтганда, Бельгия клуби учун турнир осон бўлмайди.

ПСВ

Нидерландиянинг ПСВ Чемпионлар лигасида энг ноқулай рақибларга қарши тушган жамоалар қаторида иккинчи бўлиб турибди, бизнингча.

Питер Бош бошчилигидаги жамоага биринчи саватчадан «Ливерпул» ва «Бавария» рақиб бўлди. Айни вақтдаги ПСВ бу жамоаларни ютaдиган даражада эмас.

Иккинчи саватчадан эса Нидерландия клубига «Байер» ва «Атлетико Мадрид» рақиб бўлди. «Байер» билан курашиб кўрса бўлади, аммо «Атлетико» жиддий масала.

Ўзи ўрин олган учинчи саватчадан ҳам жамоа «Наполи» каби номдор рақибга тўқнаш келмоқда.

Тўртинчи саватчадаги «Union SG» клуби билан ўйинда ғалаба қозонишга имконият бор, аммо мазкур саватдан тушган яна бир жамоа – «Ньюкасл» ҳозирда «ПСВ»га ютқазадиган ҳолатда эмас.

Шундан келиб чиққан ҳолда айта оламизки, ПСВ гуруҳдан чиқиш имконияти энг паст бўлган жамоалардан бири.

ПСЖ

УЕФА Чемпионлар лигасига ташланган қуръада «кетмони учмаган» жамоалар номинациясида биринчи ўринни амалдаги чемпионга бера оламиз. Бунга етарлича асослар бор.

Биринчи саватчадан Луис Энрике жамоасига «Бавария» ва «Барселона» рақиб бўлди. Айнан шу икки клуб ўтган йилги мавсум ПСЖни тўхтатиши айтилаётганди. Бу гаплар қай даражада асосли, бу мавсум гувоҳ бўламиз.

Иккинчи саватчадан ПСЖга рақиб бўладиган «Аталанта» ҳам айнан чемпионларнинг услубидаги жамоа ҳисобланади. ПСЖ ўз услубида ўйнайдиган жамоаларга қарши қийналишига «Челси»га қарши ўтган Клублар ўртасидаги Жаҳон чемпионати мусобақаси финалида гувоҳ бўлдик.

Грандларга очко улашувчи жамоаларни «инъом этаётган» учинчи ва тўртинчи саватчалардан ҳам ПСЖга бирорта заиф рақиб тушмади. Европа лигаси ғолиби «Тоттенҳэм», Португалия чемпиони «Спортинг», Ла Лига вакили «Атлетик Бильбао» ва ўтган мавсум ПСЖда алами қолган «Ньюкасл».

Спортда чемпион бўлиш осон, чемпионликни ҳимоя қилиш қийин деган гап бор. Айни вақтда бу гап ПСЖ жамоасига ҳар доимгидан-да кўпроқ мос келмоқда.

Ҳозирча шунча гаплар. Аслида нималар бўлади? Буни сентябр ойидан старт оладиган мусобақанинг гуруҳ ўйинларини томоша қилиш орқали билиб оламиз.