«Реал Мадрид» ҳужумчиси Килиан Мбаппе 2024/25 йилги мавсум учун «Олтин Бутса» совринига сазовор бўлди. Бу мукофот Европа миллий чемпионатлари орасида энг кўп самарали голлар урган футболчига топширилади. Франциялик юлдуз ўзининг «қироллик клуби» сафидаги илк мавсумида Ла Лиганинг 34 учрашувида 31 та гол уришга муваффақ бўлди ва UEFA коэффициент тизими асосида 62 балл билан энг юқори натижани қайд этди.

UEFA томонидан қабул қилинган тизимга кўра, кучли лигаларда урилган ҳар бир гол кўпроқ баҳоланади. Ла Лига каби топ-чемпионатларда ҳар бир гол 2 балл билан ҳисобланади. Мбаппенинг 31 та голи натижасида у 62 коэффициент балл тўплади. Унинг асосий рақобатчиси – «Спортинг» ҳужумчиси Виктор Дьёкереш Португалия чемпионатида 39 та гол ургани билан, бу лигадаги ҳар бир гол 1.5 баллга тенг баҳоланганлиги сабабли, жами 58.5 балл билан орқада қолди.

Бу соврин Мбаппе учун фаолиятидаги илк «Олтин Бутса» ҳисобланади. Реал Мадрид учун эса бу бешинчи «Олтин Бутса» соврини бўлди. Клуб тарихида аввалроқ Криштиану Роналду ушбу совринни уч марта (2011, 2014, 2015) ва Уго Санчес бир марта (1990) қўлга киритган эди. Шунингдек, Мбаппе ўзининг «Пичичи» совринига ҳам эга чиқди ва «Реал» тарихида бу совринни қўлга киритган 29-футболчига айланди. Бу кўрсаткич Испания клублари орасида рекорд саналади.

Мбаппе Ла Лиганинг охирги турида «Реал Сосиедад»га қарши учрашувда икки бор тўп киритди ва бу натижа уни Виктор Дьёкереш ҳамда «Ливерпул» ҳужумчиси Муҳаммад Салоҳдан ўзиб кетишга имкон берди. Эътиборлиси, у 2024/25 йилги мавсумда барча мусобақаларда жами 42 та гол уриб, «Реал Мадрид» тарихидаги энг сермаҳсул дебютантга айланди. У 1992/93 йилги мавсумда Иван Саморано ўрнатган рекордни ортда қолдирди.

Биргина мавсумда «Олтин Бутса», «Пичичи» ва клуб тарихидаги энг сермаҳсул дебют унвонига эга бўлган Мбаппе «Реал Мадрид» учун қандай муҳим трансфер эканини амалда исботлади. У нафақат жамоа, балки бутун Европа футболида ўз номини ёзиб қўйди.