Ўтган ҳафтада давлатимиз раҳбарига Хоразм вилоятида ислоҳотлар натижадорлиги ва янги режалар юзасидан ахборот берилиб, галдаги устувор вазифалар белгилаб олинди. Шундан келиб чиқиб вилоят ҳокими Жўрабек Рахимов Хоразм вилоятини ижтимоий-иқтисодий ривожлантириш борасида кейинги уч йилда амалга оширилган ишлар ва келгуси режалар юзасидан вилоят аҳолиси ва фаолларига мурожаат қилди.

— Вилоят ҳокими мурожаатида вилоятда иқтисодиёт тармоқларини барқарор ривожлантириш, тадбиркорликни қўллаб-қувватлаш, қурилиш, коммунал тармоқда, қишлоқ хўжалиги, туризм ва ижтимоий соҳада эришилган натижаларни чуқур таҳлил қилди, амалга оширилган йирик лойиҳаларга тўхталди, — дейди меҳнат фахрийси Мадраҳим Худойберганов. — Шунингдек, Хоразмда аҳоли турмуш фаровонлигини юксалтириш, камбағалликни қисқартириш ва бандликни таъминлаш, бунёдкорлик ва ободонлаштириш, хорижий инвеестицияларни жалб қилиш ва экспорт имкониятларини ошириш бўйича кўзда тутилган мақсад ва дастурлар ҳақида батафсил маълумот берди.

Йиғилишда сўзга чиққан нуронийлар, депутатлар ва кенг жамоатчилик вакиллари мурожаатномада билдирилган фикрлар, ўртага қўйилган вазифаларни якдиллик билан қўллаб-қувватлади.

Одилбек ОДАМБОЕВ

«Халқ сўзи».