Фото: AP

Сешанба куни Хитой АҚШнинг Хитой товарларига бўлган янги божларига тезкор жавоб сифатида АҚШ импортига тарифлар жорий этишини эълон қилди. Натижада президент Дональд Трамп Хитойни ноқонуний гиёҳванд моддалар оқимини тўхтатмагани учун жазоламоқчи бўлганлиги сабабли, дунёнинг икки етакчи иқтисодиёти ўртасидаги савдо уруши эҳтимоли юзага келди.

АҚШнинг Хитой маҳсулотларига 10 фоизлик тарифлари кучга киргандан бир неча дақиқа ўтиб, Хитой молия вазирлиги АҚШнинг кўмир ва суюлтирилган табиий гази учун 15 фоиз, хом нефть, қишлоқ хўжалиги ускуналари ва баъзи автомобиллар учун 10 фоизлик йиғим жорий этишини маълум қилди. Вазирликнинг билдиришича, АҚШ экспортига янги тарифлар 10 февралдан бошланади.

Хитой, шунингдек, Қўшма Штатларнинг бир қанча брендлари учун монополияга қарши тергов бошланганини эълон қилган. Улар ичида Google ҳам бор.

Ундан ташқари Хитой Савдо вазирлиги ва унинг Божхона бошқармаси миллий хавфсизлик манфаатларини ҳимоя қилиш учун вольфрам, теллур, молибден ва рутений билан боғлиқ маҳсулотларга экспорт назорати ўрнатаётганини айтди.

Душанба куни Трамп Мексика ва Канадага 25 фоизлик тарифлар таҳдидини чегара ва жиноятни тартибга солиш бўйича имтиёзлар эвазига 30 кунга кечиктирди. «Президент сифатида барча америкаликларнинг хавфсизлигини таъминлаш менинг масъулиятим ва мен буни қиляпман. Бу дастлабки натижадан жуда мамнунман», — дейди Трамп.

У 2018 йилдаги биринчи ҳукмронлик даврида АҚШнинг йирик савдо профицити туфайли Хитой билан икки йиллик шафқатсиз савдо урушини бошлаган эди. Бунинг натижасида юзлаб миллиард долларлик товарларга божлар жорий этилган ва жаҳон иқтисодиётига зарар етказилган.

Ушбу савдо урушини тугатиш учун Хитой 2020 йилда АҚШ товарларига йилига қўшимча 200 миллиард доллар сарфлашга рози бўлган, аммо ўтган ойги Хитой божхона маълумотларига кўра, COVID-19 пандемияси режани бузган ва унинг йиллик савдо камомади 361 миллиард долларга етгани маълум.

Президент Трамп якшанба куни Европа Иттифоқи унинг навбатдаги нишони бўлишини айтиб, АҚШ божларига тайёр туришини билдирган. Оқ уй раҳбари шу ўринда 2020 йилда иттифоқни тарк этган Буюк Британия тарифлардан қутулиб қолиши мумкинлигига ишора қилди.