Қудратилла Нажмиддинов/«Халқ сўзи». Кейинги йилларда вилоятнинг Хитой давлати компаниялари билан алоқалари мустаҳкамланиб бормоқда. Буни ушбу мамлакатнинг Наманганга инвестиция киритиш истагидаги ишбилармонлар сони ортиб бораётганида ҳам кўриш мумкин. Куни кеча ҳамкор давлатнинг «Boi Yi da» компанияси вакиллари ҳудудда мисни қайта ишлаш заводи қуриш бўйича лойиҳа таклифи билан келди. Вилоят ҳокими Шавкат Абдураззоқов хорижлик меҳмонларни қабул қилди.

Хитой компанияси раҳбари тавсия этган лойиҳага кўра, иш икки босқичда амалга оширилади. Биринчи босқич 40 миллион доллар атрофида бўлиб, ишлаб чиқариш йўлга қўйилади. Маҳсулотларни тўлиқ экспортга чиқариш кўзда тутилган.

— Биз ҳам бу борадаги мавжуд имкониятларимиз ҳақида тўлиқ маълумот бериб, лойиҳани амалга ошириш учун шароит яратиб берилишини айтдик, — дейди Наманган вилояти ҳокими ўринбосари Окибжон Иномов. — Айни вақтда хитойлик тадбиркорлар жойларга чиқиб, завод қуриш учун мавжуд имкониятлар билан танишмоқда.

Айтиш жоизки, Чуст тумани ҳудудидаги мис конларини ишлаб чиқаришга йўналтириш борасида хориж компанияси таклиф этган лойиҳа эътиборга молик. Икки томонлама манфаатли келишувларга эришилиши мис захираларини қазиб олиш ва қимматбаҳо металлни самарали тасарруф қилишнинг истиқболли режаларини натижага айлантиради.