Хитой АҚШнинг тарифлар бўйича музокаралар таклифини кўриб чиқади, бироқ Вашингтондан «самимийлик» кутмоқда. Бу ҳақда Хитой Савдо вазирлиги расмий баёнот берди. Баёнотда айтилишича, Хитой АҚШ томонидан билдирилган таклифни «ҳозирда баҳолаяпти», аммо ҳар қандай музокараларнинг бошланиши учун АҚШ аввало ўзининг нотўғри ҳаракатларини тузатиши ва бир томонлама солиқ сиёсатини бекор қилиши лозимлиги таъкидланган.

Маълум қилинишича, АҚШ томонидан Хитой маҳсулотларига нисбатан жорий қилинган жазо тарифлари апрел ойидан кучга кирган бўлиб, кўплаб товарлар учун бож миқдори 145 фоизга етган. Хитой бунга жавобан АҚШ маҳсулотларига 125 фоизгача янги божлар жорий этди. Шунга қарамасдан, смартфонлар, компютерлар ва яримўтказгичлар каби юқори технологияли маҳсулотлар ҳозирча АҚШ тарифларидан вақтинча озод этилган.

Президент Доналд Трамп аввалроқ Хитой томонидан музокараларга чақириқлар бўлганини иддао қилган ва «битимга эришиш эҳтимоли жуда юқори» эканини билдирган эди. Хитой Савдо вазирлиги бу ҳафта АҚШдан музокаралар учун таклиф тушганини тасдиқлади. Шунга қарамай, вазирлик вакиллари Вашингтондан «самимийлик» ва жиддий ёндашув кутилаётганини билдирди.

Агар АҚШ томони ўзининг нотўғри тариф сиёсатини бекор қилмаса, бундай ёндашув Хитой билан ўзаро ишончга жиддий путур етказиши мумкинлиги айтилди. «Бир нарсани айтиб, бошқа иш тутиш, ёки музокаралар номи остида таҳдид ва шантаж ишлатиш ишламайди», дейилади вазирлик баёнотида.

Ҳозирда дунё бўйича ўнлаб давлатлар АҚШ билан июл ойигача битим имзолаш бўйича 90 кунлик муддатга эга бўлиб, акс ҳолда уларни юқорироқ бож ставкалари кутмоқда. Шу билан бирга, Пекин агар зарур бўлса, савдо урушини «охиригача» олиб боришга тайёрлигини яна бир бор тасдиқлади. Бу ҳафтада Хитой Ташқи ишлар вазирлиги томонидан тарқатилган видеода: «Ҳеч қачон тиз чўкмаймиз!» деган хабар берилди.

Шунингдек, Хитой расмийлари глобал иқтисодий ўзгаришлар уларнинг экспортга қарам иқтисодиётига босим ўтказаётганини тан олдилар. Сўнгги маълумотларга кўра, апрел ойида Хитойда ишлаб чиқариш кўрсаткичлари пасайган. Бунга сабаб қилиб халқаро иқтисодий шароитларнинг кескин ўзгариши кўрсатилмоқда. Шу билан бирга, март ойида экспорт ҳажми 12 фоиздан кўпроққа ошган, бу эса корхоналар божлар кучайишидан олдин маҳсулот етказиб беришга шошилганини кўрсатади.