Канадада 160 дан ортиқ ёнғинлар назоратдан чиқиб кетди ва ҳудуднинг катта қисми аланга ичида қолди. Бу ҳақда CНН ахборот агентлиги хабар қилди.

Ёнғинлар Саскатчеван ва Манитобада авж олиб бормоқда. Бунда иқлим ўзгаришлари ўтнинг кучайишига замин яратган. Манитобанинг ўзида ўрмон ёнғинларининг 22 та йирик ўчоғи қайд этилган. Уларнинг биттаси Флин-Флон шаҳри яқинида кучайиб, қарийб 20 минг гектар ҳудудни эгаллаган.

Ҳозирда икки провинцияда ҳам фавқулодда ҳолат эълон қилиниб, эвакуация ишлари кетмоқда. Кўчирилганлар сони 17 мингга яқинлашган ва бу сўнгги йиллардаги энг катта эвакуация ҳисобланади.

Канада қуролли кучлари эвакуацияга ёрдам бериш учун чақирилган, шунингдек, Алберта, Британия Колумбияси, Шаҳзода Эдуард ороллари ва Ню-Брунсвикдан ҳам кучлар жалб этилган. Ёнғин мамлакатнинг марказий ва ғарбий ҳудудларини ҳам қамраб олди.

Алберта провинциясида эса ёнғинлар нефть ва газ қазиб олишни тўхтатишга ҳамда аҳоли пунктларидан бирининг аҳолисини эвакуация қилишга мажбур қилди.

Мутахассислар келгуси ойлар давомида ёнғинлар ва тутун муаммолари давом этишини тахмин қилмоқда. Ҳудуддаги шароитни яхшилаш учун ёмғир зарур эканлиги, аммо кучли иссиқлик ва қурғоқчилик ёғингарчилик эҳтимолини пасайтириб тургани айтилди.

Таъкидлаш жоиз, ҳозирча фавқулодда ҳолат 30 кунга эълон қилинди.