Исроил бош вазири Биньямин Нетаньяху ҲАМАС ташкилотининг АҚШ президенти томонидан илгари сурилган тинчлик режаси бўйича келишувига жавоб қайтарди. Бу ҳақида «Bild» нашри хабар берди.

«ҲАМАСнинг муносабатини инобатга олган ҳолда Исроил Трампнинг барча гаровга олинганларни зудлик билан озод қилиш режасининг биринчи босқичини зудлик билан амалга оширишга тайёрланмоқда», — дейди Нетаньяху.

ҲАМАС барча гаровга олинганларни озод қилишга принципиал жиҳатдан тайёрлигини, бироқ уларнинг баъзиларини 72 соат ичида қайтарилишини имконсиз деб ҳисоблаб, янги музокаралар ўтказишни талаб қилган.

Исроил ҳукумати баёнотида айтилишича, Исроил АҚШ президенти ва унинг жамоаси билан урушни тугатиш борасида яқин ҳамкорликни давом эттиради.

Трампнинг тинчлик режасида агар иккала томон ҳам бунга рози бўлса, уруш дарҳол тугайди ва Исроил қўшинлари келишилган чизиққа чекиниши айтилган. Шундан сўнг, ҲАМАС барча гаровга олинганларни озод қилиши керак. Исроил, ўз навбатида, умрбод қамоқ жазосига ҳукм қилинган 250 маҳбусни, шунингдек, 2023 йил 7 октябрдан кейин ҳибсга олинган 1 минг 700 нафар ғазоликни озод қилиши керак.